Бүлүү улууһун Лөкөчөөн бөһүөлэгэр олохтоох киһи Харлампьев Афанасий Кузьмич 2009 сыл кулун тутар ыйга бааһынай хаһаайыстыбатын тэриммитэ.
Хаһаайыстыба 2011 сыллаахха 50 ыанньык ынахха анаан типовой хотон тутуутун саҕалаан, 2012 сылга үлэҕэ киллэрбитэ. Хотон тутуллубут ороскуотун сабыныыга 2013 сылга «Тускул Л» бааһынай хаһаайыстыбаҕа Тыа хаһаайыстыбатын уонна аска-үөлгэ политикатын министиэристибэтэ 1163 №-дээх бирикээһинэн 500 тыһыынча субсидияны биэрбитэ.
Хаһаайыстыба сылтан сыл сүөһүтүн элбэтэн, 2014 сылга уопсайа 93 сүөһүлэнэр, онтон 54-дэ ыанньык ынах. Ити сыл хаһаайыстыба Саха Өрөспүүбүлүкэтин АПК консультациялыыр-методическай киинэ дьиэ кэргэнинэн бааһынай хаһаайыстыбаны сайыннарыы бырагырааматыгар кыттан, 4 мөл.солк. суумалаах грант ылбыта. Граннарын харчытыгар эбии тыа хаһаайыстыбатын техникатын, итиэннэ сыр оҥорор тэрил ылаллар. Билигин бэртээхэй бородууксуйа оҥоһуллан атыыга тахсан, тэрилтэ бигэ хаһаайыстыбаҕа кубулуйда.
2015 сыллааҕы отчуотунан ынаҕын уопсай ахсаана 301 буолла, мантан ыанньыга 146 төбө. Биир ынахтан ортотунан 2 397 кг. үүтү ыан, баалабайынан 350 тн. үүтү оҥорон таһааран, 219 тн. үүтү туттаран, 8 103 тыһ.солк. дохуоту ылла.
Былырыын Бүлүү эҥэр улуустарга от үүнүүтэ мөлтөх буолан, ыаллыы улуустартан от атыылаһан тиэниитигэр тахсыбыт ороскуотугар 198,40 тыһыынча солк. субсидиянан туһаммыта. Дьоҕус урбаанньыт министиэристибэтиттэн 750 тыһ. солк., үүт аһы астыыр тэрили атыылаһыыга тахсыбыт ороскуоту сабыныыга 55 тыһ.солк., техника атыылаһыытыгар тахсыбыт ороскуокка 86 тыһ.солк., итиэннэ хотонугар ынаҕы ыыр, уу иһэрдэр, ноһуом таһаарар тэриллэри атыылаһан туруоруутугар тахсыбыт ороскуоту сабыныытыгар 167,50 тыһ. солк. субсидия быһыытынан ылбыта.
Онон Афанасий Кузьмич Харлампьев аныгы кэм урбаанньыта буолан табыгастаахтык салайынан олорор инникигэ эрэллээх бастыҥ бааһынай буолла.
