26 От ыйа 26.07
  • 17°
  • $ 85,41
  • 93,17

"Азия оҕолоро" VI спортивнай оонньууларга 2000-тан тахса полицейскай бэрээдэги араҥаччылыаҕа

11:05, 29 июня 2016
Читайте нас на
Яндекс Новости
ЯДВ

  Аҕыйах хонугунан “Азия оҕолоро” VI спортивнай оонньуулар саҕаланыахтара.   Онуоха куттал суох буолуутун хааччыйыыга, уопсастыбаннай бэрээдэги көрүүгэ-истиигэ биһиги полицейскайдарбыт бэлэмнэрэ хайдаҕый?

  СӨ ИДьМ-тын уулуссаҕа уонна маассабай тэрээһиннэри ыытарга уопсастыбаннай бэрээдэги араҥаччылааһыҥҥа отделын начальнига, полиция подполковнига Семен Ефремов СИА-ҕа иһитиннэрбитинэн, оонньуулар ыытыллар кэмнэригэр улуустартан 200-чэкэ полицейскай эбии кэлэрэ, барыта 2 тыһыынчаттан тахса киһи сулууспаҕа тахсара былааннанар.

Оонньуулар ыытыллар күннэригэр Киров уулуссатыттан саҕаланар Лермонтов уулуссатыттан Поярковка диэри, Пушкин уулуссатыттан саҕалаан, Октябрьскайга диэри, ону тэҥэ, Каландарашвили, Ойуунускай уулуссалара “Триумф” спорткомлекска диэри сырыы хааччахтаныа. Дьон массыынатын Оҕо дыбарыаһын уонна Музыкальнай училище таһыгар итиэннэ дьиэлэр тэлгэһэлэригэр, оттон күрэхтэһиигэ кыттааччылар Комсомольскай болуоссакка туруоруохтара.

Кутталлаах дьайыылары сэрэтэр сыалтан, спортсменнар, ыалдьыттар олорор, аһыыр, күрэхтэһиилэр ыытыллар сирдэрин сирийэн көрбүттэр-чинчийбиттэр. Оттон оонньуулар ыытыллар кэмнэригэр 500 м тула баары барытын бэрэбиэркэлиир буолуохтара. Ити күннэргэ полицейскай постар уон маршрутунан тыырыллыахтара.

Саҥа уларыйыы быһыытынан,  өрөспүүбүлүкэтээҕи бырагыраамма чэрчитинэн “Салгын полицейскайа” диэн көтөр аппарааттары ылбыттарын бэлиэтиэххэ наада. Бу “беспилотниктары” спортивнай оонньуулар аһыллыыларын уонна сабыллыыларын кэмигэр туттуохтаахтар. Аппараат салгыҥҥа ыйанан туран, туох буола турарын тутатына тиэрдэр буолан, быһыыны-майгыны миэстэтигэр хонтуруоллуур кыахтаналлар.

Семен Николаевич бэлиэтииринэн, дьон күрэхтэһиилэр саҕаланыахтарын быдан иннинэ, эрдэттэн кэлэрэ ордук. Хонтуруолу ааһар бириэмэтин учуоттаан. Стадиоҥҥа 12 тыһыынча киһи киирэрин быһыытынан, полицейскайдар барыларын бэрэбиэркэлиир эбээһинэстээхтэр.

Билиэт кэннигэр ханан, ханна киирэллэрэ ырылхайдык сурулла сылдьар, ону болҕомтолоохтук көрөн, чопчу ол сиринэн кэлэллэрэ бэйэлэрин бириэмэлэрин сүтэрбэттэригэр көмөлөһүө. Улахан суумкалары, араас сэби-сэбиргэли, таас иһиттээх утахтары аҕалыы бобуллар.

Соторутааҕыта Россия Көҥүл тустууга чемпионатыгар Лебедев уонна Мусукаев күөн көрсүһүүлэрин араллааныгар көрөөччүлэр пластиковай бытыылканан быраҕаттаабыт түгэннэрин өйдүүр буолуохтааххыт. Итинник бэрээдэги кэһии тахсыбатын наадатыттан сэрэттэххэ, полиция үлэһиттэрэ ол түөрт киһи кимнээҕин тута быһааран, тутаталаан, мировой суут уурааҕынан, төрдүөн административнай эппиэккэ — 3 тыһ. солк. суумалаах ыстараап төлүүргэ накаастаммыттар. Маннык миэрэлэммит киһи 6 ый устатыгар официальнай спортивнай күрэхтэһиилэргэ сылдьар бырааба быһыллар.

Полиция өрөспүүбүлүкэ, куорат олохтоохторун ыҥырар: спортивнай оонньуулар кыттыылаахтарыгар, ыалдьыттарыгар, көрөөччүлэргэ, хааччыйар персоналга, бэрээдэги араҥаччылыыр үлэһиттэргэ убаастабыллаахтык сыһыаннаһалларыгар.

Саарбах маллары булар, буруо тахсар, баһаар буолар түгэннэригэр, полиция үлэһиттэригэр суһаллык биллэрэллэригэр.

Спортивнай эбийиэктэр дьаһалталарын, полицейскайдар сокуоннай соруйууларын толороллоругар, тутта-хапта сылдьыы нуормаларын тутуһалларыгар.

Маннык эппиэтинэстээх улахан тэрээһин үрдүк таһымнаахтык, этэҥҥэ ааһара хас биирдиибититтэн тутулуктааҕын умнубаттарыгар.

Следите за самым важным и интересным в Telegram-канале и WhatsApp-группе ЯСИА
Тутаах тыллар