13 От ыйа 13.07
  • 31°
  • $ 87,74
  • 95,76

"Азия оҕолоро": тустууктары уонна дуобаччыттары наҕараадалаатылар

15:04, 16 июля 2016
Текст:
Читайте нас на
Яндекс Новости
ЯДВ

Хомсомуол болуоссатыгар от ыйын 15 күнүгэр «Азия оҕолоро» Оонньуу чөмпүйүөннэригэр уонна призердарыгар уочараттаах наҕараада туттарыыта буолла.


Бу күн дуобакка уонна кураш тустуу кыайыылаахтарыгар мэтээллэри кэтэртилэр. Үгэскэ кубулуйбут бэлиэтээһин сиэрэ-туома кыайыылаах дойду өрөгөй ырыатынан доҕуһуолланна. СИА кэрэспэдьиэнэ ыалдьыттары уонна «кыһыл көмүс» мэтээллээхтэри кытта кэпсэттэ.

Александр Ким-Кимэн, «Сахаада-спорт» Саха сирин спорт национальнай көрүҥнэригэр уонна норуоттар оонньууларыгар Ассоциация президенэ:

Хапсаҕайга биһиги оҕолорбут көрдөрүүлэриттэн олох хомойбоппун. Россия атын субъектарын бэрэстэбиитэллэрэ эмиэ биһиги национальнай көрүҥнэрбитигэр кыайыы амтанын билиэхтэрин наада. Мэтээли барытын бэйэбит ылбыппыт буоллар, интэриэһинэйэ суох буолуо этэ. 

Биһиги президеммит Владимир Путин спорт национальнай көрүҥнэрэ олимпийскай дьиссипилиинэҕэ киирэллэригэр эппит сорудаҕын толоруохтаахпыт. Мин көрүүбэр, мас-рестлинг итиннэ чугаһатта.

Владимир Птицын, Саха сирин дуобакка Федерациятын президенэ:

Дуобакка кыттааччы географията кэҥээн иһэрэ үөрдэр. Урут Монголия, Башкортостан уонна Саха сирэ эрэ сүрүннээн кыттара. Биһиги дуобаччыттарбыт барыта алта мэтээли ыллылар. Бу үчүгэй көрдөрүү. Ураллааҕы федеральнай уокуруктан күүстээх утарсааччылар бааллар.

Марсель Шарафутдинов, «Азия оҕолоро-2016» Оонньуу норуоттар икки ардыларынааҕы дуобакка чөмпүйүөнэ:

Биллэн турар, олус долгутуулаах оонньуу. Утарсааччыларым тэбис-тэҥҥэ үктэһэн испиттэрэ. Бүтэһик туурга олох да ахсааны тэҥнээһин эмиэ баара. Түмүктүүр түһүмэххэ долгуйбакка, холкутук оонньообутум миэхэ көмөлөстө. Ол иһин кыайдым. Дуобакка куруук тохтоло суох эрчиллии наада. Өссө тулуур ирдэнэр. Иллэҥ кэммэр футболлуубун уонна волейболлуубун. Аны икки нэдиэлэнэн Пинск куоракка Европа чемпионатыгар кыттабын. Манна оонньообут оҕолор эмиэ онно кыттыахтара. Ол иһин «Азия оҕолорун» кэнниттэн тута эрчиллиибин саҕалыыбын.

Следите за самым важным и интересным в Telegram-канале и WhatsApp-группе ЯСИА