«Азия оҕолоро» норуоттар икки ардыларынааҕы Оонньууларга көҥүл тустуу түмүктүүр чааһыгар Саха сирин үс тустууга таҕыста. Бастакы күҥҥэ мэтээли ылыыга түөрт ыйааһыҥҥа уолаттар уонна кыргыттар күрэхтэстилэр.
Финалга Саха сирин бөҕөстөрө Дмитрий Илларионов (35 кг), Айсен Никифоров (46 кг) уонна Никита Софронов (58 кг) таҕыстылар.
Бүлүү спортсмена Айсен Никифоров көбүөргэ Монголия тустуугун кытта киирсиигэ 6:6 счекка, хаачыстыбатынан баһыйтаран иһэн, хапсыһыы түмүктэнэрэ баара-суоҕа уон эрэ сөкүүндэ хаалтын кэннэ, кыраһыабай киирсиини көрдөрдө уонна кыайыыны ситиһэн бар дьонун улаханнык үөртэ. Тустуу 8:6 счетунан Саха сирин спортсменын туһатыгар түмүктэннэ.
Түмүк киирсиилэр 15.00 чаастан «Триумф» спорткомплекса салҕаналлар. Айсен Никифоров Казахстантан кэлбит Ораз Жассуланныын, Никита Софронов Азербайджан спортсмена Туран Байрамовтыын, Дмитрий Илларионов Таджикистан бөҕөһө Саид Шохруштуун күөн көрсүөхтэрэ.
Үһүс бириистээх миэстэни Саха сирин спортсменнара Дмитрий Григорьев, Даниил Иванов уонна Максим Лубянецкай былдьаһыахтара.
