«Эдэр саас» хаһыат тохсус төгүлүн тэрийэр «Саха ыччатын – тыа сиригэр: СЫТС» күрэхтэһиитэ быйыл Амма улууһун Абаҕа нэһилиэгэр буолар. От ыйын 22-24 күннэригэр, үс күн устата, улуустар, нэһилиэктэр, түмсүүлэр хамаандалара оту охсууга, мунньууга, кэбиһиигэ, ынах ыаһыҥҥа уонна солуур оргутуутугар күрэхтэһиэхтэрэ.
Бу уруккута “От-шоу” – билигин кэҥээн “СЫТС” диэн ааттанар. Санатан суруйдахха, былырыыҥҥы «СЫТС» Мэҥэ Хаҥалас Томторугар буолбута. Кыайыыны Амма улууһун ыччатын хомуур хамаандата ситиспитэ. Кинилэр көҕүлээһиннэринэн уонна ыҥырыыларынан быйылгы “СЫТС”-ы Аммаҕа ыытыахха диэн быһаарбыппыт. Итиэннэ быйыл Аммаҕа ыччат сыла!
Таарыйа холи кырааска фестивалыгар кытын
«СЫТС» кыттааччылара Амма өрүс кытылыгар палаточнай куоракка олохсуйуохтара. Киэһээ өттүгэр уоттаах-күөстээх дискотека, саха эстрадатын сулустара кыттыылаах кэнсиэр, кутаа уот тула гитаранан ырыа, Амма өрүскэ сөтүө, дьэдьэн уонна күүстээх үлэ эһигини күүтэр. Маны таһынан, Индия холи кырааскатын фестивала, хапсаҕай, мүһэ былдьаһыыта спортивнай күрэхтэһиилэр буолуохтара.
Бириис – уу харчынан
Быйыл Тыа хаһаайыстыбатын министиэристибэтэ бырайыакпытын харчынан өйөөтө, онон күрэхтэһии бирииһин фондата 150 000 солк. диэри улаатта. Бастакы миэстэни ылбыт хамаанда 70 000 солк., иккискэ – 50 000 солк. уонна үһүскэ – 30 000 солк. уу харчынан наҕараадалыахтара. Маны таһынан, Ыччат дьыалаларыгар уонна дьиэ кэргэн бэлиитикэтигэр министиэристибэттэн, «СЫТС» спонсордара – «Уус-Экспо», «Чороон XXI век», «Канта», «Bearеk», «Туймаада-Лизинг», «Сахаспецтехника», «ЯЗолото» хампаанньалартан анал бириистэри «Бастыҥ кыдамаһыт», «Бастын бугулдьут», «Бастын мунньааччы», «Бастыҥ түсчүт», «Бастыҥ ыанньыксыт», «Бастыҥ охсооччу», «Кэскиллээх охсооччу» аатын ылбыттарга туттарыахпыт.
«Саха ыччатын – тыа сиригэр-2016» күрэхтэһиигэ ыччат таптыыр сиригэр, Аммаҕа, көрсүөххэ диэри!
