Аҕыйах хонугунан саха бөҕөһө Айаал Лазарев Токиоҕа ыытылла турар Олимпиада көбүөрүгэр бэйэтин кыаҕын көрдөрүө. Айаал Олимпиада көбүөрүгэр иккис тахсыыта. Кини утарылаһааччыларынан аан дойду күүстээх спорсменнара, урукку Олимпиада оонньууларын кыайыылаахтара бааллар диэн, СИА суруйар.
125 кг диэри ыйааһыннаах бөҕөстөр көбүөргэ атырдьах ыйын 5 күнүгэр тахсыахтара. Биир күн иннинэ кимниин киирсэллэрин билиэхтэрэ.
Айаал Лазарев ыйааһыныгар саамай элбэх ситиһиилээҕинэн бүтэһик Олимпиада кыайыылааҕа, аан дойду икки төгүллээх, Европа аҕыс төгүллээх чөмпүйүөнэ Турция бөҕөһө Таха Акгюль буолар. Кини кэннэ Риотааҕы Олимпиада боруонса мэтээлин хаһаайына, аан дойду үс төгүллээх, Европа икки төгүллээх чөмпүйүөнэ, Грузия тустууга Гено Петриашвили буолар.
Арассыыйа сүүмэрдэммит хамаандатыттан Европа призера эдэр бөҕөс Сергей Козырев, Казахстаантан Азия чөмпүйүөнэ Юсуп Батырмурзаев, Кытайтан Денг Живей, Украинаттан Александр Хоцяновскай, Белоруссияттан Денис Хроменков киирсиэхтэрэ. Америкаттан Гэйбл Стивенсон, Ирантан Амир Заре тустуохтара.
Итилэри таһынан Амарвир Дейси (Канада), Диэльдин Амбдельмотталеб (Египет), Эгзон Шала (Косово), Джахид Беррахаль (Алжир), Лхагвазерель Мунхтур (Монголия), Геннадий Чудинович (Германия) бааллар.
Айаал Лазарев бастакы утарсааччыларын быһаарар сэрэбиэй атырдьах ыйын 4 күнүгэр олохтоох бириэмэнэн 13:40 — 14:00 ч диэри ыытыллыа.
Квалификационнай киирсии атырдьах ыйын 5 күнүгэр күнүс 11 ч. буолуо, финал аҥарынааҕы киирсиилэр киэһэ 18:15 ч былааннаммыттар. Түмүктүүр киирсиилэр атырдьах ыйын 6 күнүгэр олохтоох бириэмэнэн киэһэ 19:30 ч. саҕаланыахтара.
