Россия үөрэнээччилэрэ быйыл аттестаты ылалларыгар нуучча тылыгар кырата 24, базовай таһымнаах математикаҕа сэттэ баалы (эбэтэр «үс» сыананы) ылыахтаахтар, ол туһунан РИА Новости сенатор Айрат Гибатдиновка сигэнэн иһитиннэрэр. Ону тэҥэ атын предметтэргэ барыларыгар баал кыра боруоктара туруорулуннулар.
Сенатор этэринэн, БКЭ кыра бааллара икки таһымҥа арахсаллар: аттестакка уонна үрдүк үөрэххэ киирэргэ. Физика, химия уонна биология бырагырааматын баһылааһыны бигэргэтэргэ 36, профильнай математикаҕа — 27, информатикаҕа — 40, историяҕа — 32, географияҕа — 37, обществознаниеҕа — 42, литератураҕа — 32, омук тылларыгар — 22 бааллары ылыахха наада.
Гибатдинов кыра боруогу ситиһии төлөбүрдээх үөрэххэ да киириини мэктиэлээбэтин эттэ, үрдүк үөрэх иһигэр куонкурус сүүмэрдээһинэ ааһарын бэлиэтээтэ. Кини үрдүк үөрэх кыһалара оҕо биирдиилээн ситиһиилэрин иһин 15 эбии баалга тиийэ ааҕыахтарын сөбүн эттэ: туйгун аттестат, ГТО кыһыл көмүс бэлиэтэ, волонтерство (түөрт сылтан итэҕэһэ суох ыстаас), олимпиадаларга кыайыылар. Үксүгэр хас биирдии ситиһии биэс баалтан ордубат, ол гынан баран чопчу ахсааны үрдүк үөрэх кыһата бэйэтэ тус олохтуур. Үрдүк күрэстэһии усулуобуйатыгар чопчу бу баллар бюджекка киириигэ үгүстүк быһаарыылаах буолаллар.
