Госдума энергиэтикэҕэ кэмитиэтэ ахсынньы 13 күнүгэр Уһук Илиҥҥэ электроэниэргийэ тарыыбын Арассыыйа орто балаһатыгар тэҥнииргэ анаммыт сокуон барылын ырытта. Маннык тэҥнээһин промышленнай туһанааччыларга оҥоһуллуохтаах. Ахсынньы 21 күнүгэр сокуон барыла иккис ааҕыыга киирэр. Минэнерго ааҕыытынан, Саха сирин юридическэй сирэйдэригэр тарыып 50% чэпчиир. Ити туһунан «Коммерсант» иһитиннэрэр.
2017 сыл тохсунньу 1 күнүттэн оптовай ырыынакка (дойду киинигэр, Уралга уонна Сибииргэ) бигэтийбит кыамтаҕа эбии төлөбүрү оҥоруу сокуон барылыгар баар. Эбии хоммуллубут үп-харчы суотугар Уһук Илин ыраах биир энергосистиэмэлэргэр тарыып чэпчиэхтээх.
Егор Борисов Саха сиригэр элбэх локальнай дизель станциялара баалларынан, электроэниэргийэҕэ тарыып үрдүгүн туһунан боппуруоһу федеральнай киин таһымыгар өрөспүүбүлүкэ салалтата 2005 сылтан ыла көтөхпүтүн эппитэ.
«Алта сыл былаһын тухары өрөспүүбүлүкэҕэ тарыып тоҕо үрдүгүн, регион бэйэтэ эрэ ити кыһалҕаны быһаарар кыаҕа суоҕун туһунан этэн, дакаастаан кэллэ. Элбэх үп-харчы тарыып араастаһыытын толуйууга эрэ буолбакка, дизельнай уматыктан тахсыыга ороскуоттанарын быһаарбыппыт», — диэбитэ.
Сокуон барылыгар иккис ааҕыыга «техническэй көннөрүүлэр» киирдилэр.
Барыллааһын ааҕыынан, Уһук Илин регионнарыгар энерготарыып кВтч иһин 3,36 солкуобайтан халбаҥныыр. Амур уобалаһыгар 9,2 солк. Магадан уобалаһыгар юридическэй сирэйдэргэ 34% кыччыахтаах, Камчаткаҕа 20%, Сахалиҥҥа —46%, Чукоткаҕа —65%, Саха сиригэр —50%.
