2024 сылга буолуохтаах «Азия оҕолоро» норуоттар икки ардыларынааҕы VIII спортивнай оонньууларга анаммыт саҥа бэлиэни көрдөрдүлэр. Логотип сүрүн уруһуйа Туймаада хочотугар күннээх күн хамсана сылдьар оҕону ойуулуур.
Логотипка оҕо уруһуйа күрэхтэһээччилэр икки ардыларыгар доҕордоһууну уонна убаастабыллаах сыһыаны көрдөрөр. Кини оонньуу сүрүн идеятын тоһоҕолуур, Азия бары муннуктарыттан омугуттан, дойдутуттан тутулуга суох оҕолору түмүү.
Саҥа логотип өҥнөрө Саха сирин айылҕатын ойуулуур: Туймаада хочотун күөх өҥүнэн, Өлүөнэ өрүһү халлаан күөҕүнэн уонна Саха сирин култууратын биир сүрүн бэлиэтин күнү араҕаһынан.
