Атырдьах ыйын 12–14 күннэригэр Сочига дойду регионнарыттан бастыҥ мадьынылара мустан, Роман Дмитриев кэриэһигэр Бүтүн Арассыыйатааҕы турнир кыайыылаахтарын уонна призердарын быһаарсыахтара. Бу сир талыллыбыта мээнэҕэ буолбатах — күрэхтэһии кэнниттэн дойду сүүмэрдэммит хамаандатын бастакы нүөмэрдэрэ үөрэтэр-эрчийэр түмсүүлэргэ хаалыахтара.
Турнир кыайыылаахтара мас-рестлиҥҥэ Арассыыйа успуордун маастара ааты ылыахтарын сөп.
Күрэхтэһии эр дьоҥҥо 60, 65, 70, 75, 80, 90, 105, 125 уонна 125-тэн тахса кг диэри ыйааһыннарга, оттон дьахталларга 55, 65, 75, 85 уонна 85-тэн тахса кг диэри категорияларынан барыаҕа. Күрэс икки хотторуу кэнниттэн туорааһыннаах систиэмэнэн «А» уонна «Б» бөлөхтөргө арахсан ыытыллыаҕа.
