Олоҥхо күнүн көрсө, сэтинньи 23 күнүгэр, Ил Дархан стипендиятын биэрэр туһунан сертификаттары олоҥхоһуттарга, оһуохай таһаарааччыларга, уустарга уонна быйыл бастакытын норуот маастардарыгар туттардылар. Ил Дархан төрүт култуураны тыыннаах илдьэ сылдьааччыларга махтанна.
Айсен Николаев стипендия былырыын олохтоммутун, быйылгыттан норуот маастардарыгар бэриллэр буолбутун бэлиэтээтэ. «Олоҥхо ыһыаҕа 2024 сылга Аммаҕа, салгыы Нерюнгрига буолар. Национальнай бырааһынньыгы ыытыы култуурабыт сайдыытыгар уонна территория социальнай-экономическай сайдыытыгар улахан оруоллаах. Үлэни салгыы ыытыахпыт», — диэтэ кини.
Ил Дархан эппитинэн, ыам ыйын 25 күнүгэр Оһуохай күнэ бэлиэтэнэр буолуоҕа.
Олоҥхоһуттарга стипендияны туттулар: Анфиса Авелова (Томпо), Маргарита Григорьева (Бүлүү), Иван Григорьев (Мэҥэ Хаҥалас), Николай Григорьев (Чурапчы), Алексей Николаев (Таатта), Дарья Осенина (Уус Майа). Олоҥхоҕо олоҕун тухары стипендиянан Сунтаар улууһуттан Никандр Тимофеев ылла.
Оһуохайы толорууга: Афанасий Алексеев (Бүлүү), Дария Алексеева (Горнай), Роман Иванов (Сунтаар), Николай Карамзин (Мэҥэ Хаҥалас), Семен Морфунов (Чурапчы), Марта Николаева (Сунтаар), Розалия Тихонова (Ньурба).
Уустарга: Сарыал Билюкин (Таатта), Устин Борисов (Мэҥэ Хаҥалас), Петр Луковцев (Таатта), Алексей Скрябин (Амма), Егор Федоров (Бүлүү), Реворий Чемчоев (Бүлүү).
Норуот маастардарыгар: Пантелеймон Борисов (Үөһээ Бүлүү), Варвара Васильева (Уус Алдан), Петр Егоров (Мэҥэ Хаҥалас), Федор Марков (Дьокуускай), Владимир Саввинов (Ньурба), Ольга Седалищева (Чурапчы), Анна Сергеева (Өлөөн).
