Саха Өрөспүүбүлүкэтин бырабыыталыстыбатын бэрэссэдээтэлин бастакы солбуйааччыта Дмитрий Садовников өрөспүүбүлүкэни уматыгынан хааччыйыы боппуруостарынан суһал ыстаап мунньаҕын ыытта. Мунньах түмүгүнэн от уонна атырдьах ыйдардааҕы от хомууругар тыа хаһаайыстыбатын табаары оҥорооччуларыгар уматыгы-оҕунуоҕу (ГСМ) хааччыйыы биир кэлим бэрээдэгин киллэрэр туһунан быһаарыы ылылынна. Сүбэлэр муниципальнай оройуоннарга барытыгар ыытыллыахтара.
Айсен Николаев дьаһалынан Тыа хаһаайыстыбатын уонна ас-үөл бэлиитикэтин министиэристибэтэ Гражданскай оборуона дьыалаларыгар уонна нэһилиэнньэ олоҕор-дьаһаҕар куттал суох буолуутун хааччыйыыга министиэристибэни кытта холбоһуктаах оҥорбут докумуона муниципалитеттар, толоруулаах былаас уорганнара уонна уматык хампаанньалара бэйэ-бэйэлэрин кытта үлэлэһиилэрин биир кэлим алгоритмын олохтуур.
Муниципальнай тэриллиилэринэн бигэргэммит техника уматыгар наадыйыы төрүттэригэр олоҕуран, тыа хаһаайыстыбатын табаары оҥорооччулар, ол иһигэр кэтэх хаһаайыстыбалар, сапараапкаланар ыстаансыйаларга көрүллүбүт кээмэйдэринэн уматыгы ылыахтарын сөп. Ол эрээри ГСМ оройуоҥҥа үлэлии турар уматык хампаанньаларын ресурсаларын көрөн тарҕатыллыаҕа, бу баар саппаастары муҥутуур көдьүүстээхтик туһанарга кыаҕы биэриэҕэ.
Тыа хаһаайыстыбатын уонна ас-үөл бэлиитикэтин миниистирэ Артем Александров эппитинэн, министиэристибэ муниципальнай тэриллии аайы даннайдары чопчулааһыны бүтэрэн эрэр. Тыа хаһаайыстыбатын тэрилтэлэрин, бааһынай уонна кэтэх хаһаайыстыбалар сайаапкаларын учуоттаан, өрөспүүбүлүкэ холбоһуктаах биир кэлим уматыкка наадыйыыта оҥоһуллар.
Миниистир этэринэн, Тыа хаһаайыстыбатын министиэристибэтин суһал ыстааба суукканы эргиччи кэриэтэ эрэсиимҥэ үлэлиир. Уопсайа 25 тыһыынча субъегы, ол иһигэр кэтэх хаһаайыстыбалары, 400-чэкэ тыа хаһаайыстыбатын тэрилтэлэрин уонна кээпэрэтииптэри, ону тэҥэ 2,5 тыһыынча кэриҥэ бааһынай хаһаайыстыбаны уонна урбаанньыттары уматыгынан хааччыйыахха наада.
Тыа хаһаайыстыбатын таһынан, суһал ыстаап олоҕу-дьаһаҕы хааччыйар атын салаалары уматыгынан хааччыйыы боппуруостарын көрдө. Инники күөҥҥэ пассажирдары тиэйии-таһыы, паром сырыыта, коммунальнай тэрилтэлэр уонна нэһилиэнньэлээх пууннар тохтоло суох үлэлииллэрин хааччыйар атын тэрилтэлэр буолаллар.
Мунньах түмүктэрин таһаарарыгар Дмитрий Садовников суһал ыстаап үлэтэ салҕанарын бэлиэтээтэ:
«Бүгүн сүрүн сорук — от хомууругар тыа хаһаайыстыбатын оҥорон таһаарааччылары уматыгынан хааччыйыы. Биһиги күн аайы муниципальнай оройуоннартан информацияны ылабыт, хас биирдии көрдөһүүнү көрөбүт уонна наада буоллаҕына уматык хампаанньаларын кытта тус сыаллаах быһаарыылары ылынабыт. Тэҥинэн федеральнай былаас уорганнарын уонна ниэп хампаанньаларын кытта уматык бородуукталарын тиэрдиини бигэ туруктаах оҥорууга уонна экэниэмикэ сүрүн салааларын тохтоло суох үлэлэрин хааччыйыыга бииргэ үлэлэһии салҕанар», — диэтэ Дмитрий Садовников.
