РФ тыа хаһаайыстыбатын министиэристибэтэ быйыл фермердэр уонна кооперативтар үп-харчы өттүнэн өйөбүллэрин улаатыннарар былааннаах. Бу туһунан Арассыыйа тыатын хаһаайыстыбатын миниистирэ Дмитрий Патрушев Россия бааһынай (фермерскэй) уонна тыа хаһаайыстыбатын кооперативтарын ассоциацияларын (АККОР) XXXIV съеһигэр иһитиннэрдэ.
Миниистир кэтэх хаһаайыстыбаларга быйыл ордук болҕомто уурулларын бэлиэтээтэ. Саха сиригэр бу хайысханан туох үлэ бара турарын СИА тустаах министиэристибэ пресс-сулууспатыттан ыйыталаста.
«Саха сиригэр кэтэх хаһаайыстыбалары өйүүр миэрэлэр салҕаналлар, хас биирдии ыанар ынахха судаарыстыбаттан 37 тыһ. солкуобай суумалаах көмө көрүллэр. Маны таһынан, түргэнник ситэр хайысхаҕа туһунан (куурусса, сибиинньэ о.д.а) уонна оту тиэйиигэ көмө харчы көрүллэр. Быйыл тыа сирин кэлим сайдыытыгар Саха сиригэр барыта 664 мөл солкуобай көрүлүннэ, онтон 578,4 мөл солкуобайа дойду бүддьүөтүттэн, 53,1 мөл солкуобай өрөспүүбүлүкэ бүддьүөтүттэн», — диэн Саха сиринээҕи тыа хаһаайыстыбатын министиэристибэтин пресс сулууспата иһитиннэрдэ.
«Россияҕа «Самозанятай» быһыытынан регистрацияламмыт кэтэх хаһаайыстыбалаахтары өйөөһүн биир сүрүн хайысханан буолла. Маннык хаһаайыстыбалар былырыыҥҥыттан үүтү, эти, оҕуруот аһын уонна хортуоппуйу оҥорууга субсидия ылаллар. Тыа хаһаайыстыбатын министиэристибэтэ 2023 сылтан оҕуруот аһын уонна хортуоппуйу үүннэриигэ федеральнай бырайыагы олоххо киллэриэҕэ. Бу хайысханы сайыннарыыга ЛПХ-ларга эбии субсидия көрүлүннэ. Ону сэргэ, быйылгы сылтан самозанятайдар уонна кэтэх хаһаайыстыбалар чэпчэтиилээх кирэдьииккэ киириэхтэрин сөп«, — диэн Дмитрий Патрушев эттэ.
КФХ эбэтэр ИП курдук бэлиэтэнэн үүт туттарарга соруммут хаһаайыстыбалар ЛПХ-ларга көрүллэр 37 тыһ суумалаах көмө харчыны ылбаттар диэн Саха сиринээҕи тыа хаһаайыстыбатын министиэристибэтигэр тоһоҕолоон бэлиэтээтилэр.
