Саха сиригэр доруобуйаларыгар хааччахтаах оҕолорго аналлаах адаптивнай үөрэх комплекса тутуллуоҕа. Эбийиэк 200 миэстэлээх оҕо саадтаах, 550 миэстэлээх оскуолалаах, ону таһынан 350 миэстэлээх интернат-идэҕэ үөрэтэр оскуолалаах буолуоҕа. Туһааннаах сөбүлэһии республика уонна «ПроШкола» ХЭУо (ВЭБ.РФ) икки ардыларыгар түһэрсилиннэ, диэн СИА кэпсиир.
Сөбүлэһиини Саха сирин экономикатыгар миниистирэ Майя Данилова уонна «ПроШкола» ХЭУо генеральнай директора — «ВЭБ.РФ» госкорпорация бизнес- блок толорооччу директора Алиса Денисова илии баттаатылар. Бырайыак уопсай сыаната — 4,9 млрд солк., итинтэн федеральнай субсидия — 1,3 млрд солк.
«Саамай аныгы уонна Россияҕа маннык киэптээх бастакы адаптивнай комплекс буолар. Комплекс олус кэрэ миэстэҕэ — Сэргэлээх шоссетыгар туруоҕа. Билигин доруобуйаларыгар хааччахтаах 293 оҕо Дьокуускай араас оскуолаларыгар үөрэнэр, тоҕо диэтэххэ, былырыын 34 №- дээх коррекционнай оскуола үлэтэ тохтообута. 2024 сылга саҥа оскуола үлэҕэ киириэҕэ», — диэн республика экономикатын миниистирэ Майя Данилова кэпсээтэ.
Эбийиэк тутуута 2023 сылга саҕаланар.
Хаартыска: Андрей Сорокин.
