29 Кулун тутар 29.03
  • -13°
  • $ 92,26
  • 99,71

Оттооһуҥҥа урукку үгэстэри туттуохха диэн Томпо дьокутаата этии киллэрдэ

17:01, 09 декабря 2021
Текст:
Читайте нас на
Яндекс Новости
ЯДВ

Быйыл Саха сиригэр, ол иһигэр Томпо оройуонугар, сүөһү кыстыыр ото тиийбэт буолан аттынааҕы уобаластартан атыыластыбыт. Ити төһө сөптөөх быһаарыныы буоларый уонна инникитин итинник түгэн хатыламматын курдук тугу гыныахха сөбүй? Ыйытыыларга Томпо оройуонун муниципальнай сэбиэтин Байаҕантай — Мэҥэ-Алдан уокуругун дьокутаата Алексей Павлов эппиэттээтэ.

Ударник сэлиэнньэтигэр олорор Алексей Павлов өр сылларга үөрэх эйгэтигэр үлэлээтэр да, тыа сиригэр олорор уонна кэтэх хаһаайыстыбатыгар уруккуттан сылгы ииттэр буолан, балаһыанньаны иһиттэн билэр. Дьокутаат буоларын быһыытынан сүөһүлээх дьон кыһалҕатын быһаарарга кыһаллыахтаах уонна туруорсуохтаах.

Кини ыйытыыларга маннык хоруйдаата:

— Ааспыт сайын от үүнүүтэ быстар мөлтөх этэ. Үрдүк сирдэр курааннаабыттара, от намыһах, илии сирдэригэр эрэ үүммүтэ. Былаан ырааҕынан туолбата эрдэттэн биллибитэ. Онуоха эбии ойуур баһаардара күчүмэҕэйдэри үөскэппиттэрэ.

Өрөспүүбүлүкэ, оройуон салалталара сөптөөх дьаһаллары кэмигэр ылан, атын сирдэртэн от кэлэн, ынах, сылгы ахсаанын улаханнык аччаппатыбыт. Оройуоннааҕы тыа хаһаайыстыбатын управлениетын уонна нэһилиэк исписэлиистэрин өҥөлөрүнэн сайаапкаламмыт от аҥарын уу суолунан туппуппут.

Кэлии от хаачыстыбата бэйэ соҕотуопкалаабыт отугар тиийбэтэ биллэр. Сорох рулоҥҥа эрбэһинэ үгүс, сороҕо үчүгэй хаачыстыбалаах. Ынах, сылгы сиир ото. Удамыр сыанаҕа син орто хаачыстыбалаах от кэллэ диэн тыа дьоно үөрдүбүт. Оннооҕор бэйэ бэлэмнээбит ото араастаах буолар.

Кини этэринэн, оту атын сиртэн атыылаһыы, тиэйэн аҕалыы өрөспүүбүлүкэ да, оройуон да бюджетыгар улахан хоромньулаах. Ол иһин инникитин оту төһө кыалларынан бэйэ хааччынара ордук буолуо этэ. Үрэхтэр бастара, тардыылара, күөллэр атахтара кураан да дьылларга оттоох буолаллар.

Сопхуос эстиэҕиттэн сир оҥоһуута, күрүөлээһин умнууга хаалла. Наука этэринэн, саас, күһүн ходуһаны сүөһүгэ, сылгыга тэбистэрии түмүгэр үүнүү 30 % тиийэ намтыыр. Урут, тэрээһиннээх хаһаайыстыбалар баалларын саҕана, ходуһа, мэччирэҥ сирдэрэ диэн араараллара.

Ил Дархан Айсен Сергеевич Николаев кэлэр сылга өрөспүүбүлүкэ бюджетыгар тыа хаһаайыстыбатыгар үбү 12 млрд. солк тиэрдэргэ сорудахтаата. Сир быйаҥыттан туһаныахпытын баҕарар буоллахпытына бүтэйдээһини саҕалыахпытын наада. Манна үп көрүллүөн, анал бырагыраамалар үлэлиэхтэрин баҕарабын, — диэн Томпо олохтооҕо санаатын эттэ.

Ааптар: Евдокия Неустроева, Томпо улууһа

Следите за самым важным и интересным в Telegram-канале и WhatsApp-группе ЯСИА