Дьокуускай куорат «Остуоруйа дойдута» диэн 39 №-дээх оҕо саадыгар оҕону иитиигэ-үөрэтиигэ ананар үлэ тиһиктээхтик уонна сэргэхтик ыытыллар. Манна Аҕа дойдуну көмүскээччилэр күннэрин көрсө икки күннээх күрэхтэһии бөлөхтөрүнэн тигинэччи барда. Бу туһунан оҕо саадын эбии үөрэхтээһиҥҥэ педагога Любовь Федорова кэпсиир.
«Мээчик тутуурдаах мэһэйдээх сирдэринэн сүүрүүлээх, уһуну ыстаныылаах, сыал быраҕыылаах о.д.а. сымса туттунуулары эрэйэр күрэхтэһии «Мир Диснея», «Сир симэхтэрэ», «Солнечные зайчики» уонна «Изумрудный город» бөлөхтөр уолаттарыгар ыытылынна. Спортсменнар маҥнай дьүүллүүр сүбэҕэ бэйэлэрин билиһиннэрдилэр. Ол кэннэ, төрөппүттэр ытыстарын тыаһыгар доҕуһуоллатан, ырыалаах-тойуктаах парадтаатылар. Күрэхтэһии күүрээннээхтик барда», — диэтэ Любовь Иннокентьевна.
«Сир симэҕэ» бөлөххө кырачааннар «Пилоты», «Танкисты» хамаандаларга арахсан күрэхтэспиттэр. «Солнечные зайчики» — «Матросы» уонна «Танкисты», «Изумрудный город» — «Воздушные десанты», «Пехота» хамаандаларынан, «Мир Диснея» бөлөххө күрэхтэһии аҕалар уонна убайдар кыттыгастаах буолбут. Тыҥааһыннаах күрэхтэһиилэри физинструктор Марфа Константинова иилээн-саҕалаан ыыппыт. Түмүккэ, тэрээһин кыттыылаахтарыгар үөрүүлээх быһыыга-майгыга махтал суруктар туттарыллыбыттар, мэтээллэр кэтэрдиллибиттэр. Итини сэргэ, сибэкки курдук киэргэммит кырачаан кыргыттар бэйэлэрэ оҥорбут открыткаларын уолаттарга бэлэх ууммуттар.
