Инбэлииттэри медицинскэй-социальнай реабилитациялааһын өрөспүүбүлүкэтээҕи техникум-интерната өрөспүүбүлүкэтээҕи анал (коррекционнай) оскуоланы кытары пилотнай бырайыагы олоххо киллэрэр.
Бырайыак чэрчитинэн оскуола үөрэнээччилэригэр «Биэкэр-маастар» идэҕэ үөрэтии тэриллиэҕэ. СӨ Үлэҕэ уонна социальнай көмүскэлгэ министиэристибэ иһитиннэрбитинэн, бырайыак соругунан ыччаттар оскуоланы бүтэрбиттэрин туоһулуур аттестаты сэргэ идэҕэ үөрэммиттэрин туһунан сибидиэтэлистибэни ылыы буолар. Ол түмүгэр эдэр дьон үлэ ырыынагар балачча күрэстэһэр кыахтаныаҕа.
Быйыл биэкэр идэтигэр үөрэтии саҕаланыаҕа. Эһиилгиттэн атын оробуочай идэлэри киллэрии былааннанар.
Билиҥҥитэ билиһиннэрэр, сырдатар бэсиэдэлэр, экскурсиялар ыытыллаллар. Онон өрөспүүбүлүкэтээҕи техникум-интернакка үөрэниэххэ сөптөөх идэлэр испииһэктэрэ сыл аайы саҥардыллар. Сүрүннээн, үлэ ырыынагар наадалаах идэлэргэ үөрэтэр сорук турар.
