12 От ыйа 12.07
  • 22°
  • $ 87,99
  • 95,68

Норуоттар икки ардыларынааҕы Арктика оскуолата балаҕан ыйын 1 күнүттэн үлэни саҕалыырга бэлэмнэнэр

Читайте нас на
Яндекс Новости
ЯДВ

Норуоттар икки ардыларынааҕы Арктика оскуолатын дьиэтин үлэҕэ туттарыы бу күннэргэ түмүктэниэхтээх. Бэлэмнэнии хаамыытын Ил Дархан Айсен Николаев миэстэтигэр тиийэн билистэ. Кини оҕолору сүүмэрдээһин быраабылатын олунньуга бүтэрэн, саас ылыыны саҕалыырга эттэ, диэн иһитиннэрэр СИА. 


Арктика оскуолатын саҥа тутуллубут эбийиэгэ бэлэм. Бу туһунан бэдэрээччиттэр эттилэр. Холбооһуҥҥа бэлэмниир үлэлэр уонна сууйуу-сотуу эрэ хаалбыт. Ол кэннэ эбийиэги Баһаарынай хонтуруол уонна Роспотребнадзор бэрэбиэркэтигэр көрдөрүөхтэрэ. Салгыы оборудованиетын таҥан туруоруохтара, олбуорун сааһылыахтара, биллэн турар, оҕолору эксээмэннээн, сүүмэрдиэхтэрэ. Регион баһылыга Айсен Николаев Арктика оскуолатын бэлэмин көрдө. Оскуола дириэктэрэ Сардана Татаринова саҥа тутууну билиһиннэрдэ.

Хас биирдии кылааска сенсорнай дуоскалар баар буолуохтара. Бассейн, спортивнай саала, актовай уонна синхроннай тылбаастаах конференц-саала, оннооҕор планетарий. Аныгы технологиялар көрдөрүүлэрин хаачыстыбата 4К тэҥ. Оскуола киэҥ-куоҥ: кэтит көрүдүөрдэр, атрим.

Билигин олбуор иһэ хайдах буолуохтааҕа уонна массыына парковката ханан баар буолара быһаарыллар. Дириэктэр Сардана Татаринова дьиэлэриттэн сылдьар оҕолору таһар автобус тохтобулун оскуолаттан чугас туруорар ордугун эттэ. Парковка онно баар буолара сөптөөҕүн ыйда. Онон сотору кэминэн комплекска сыста сытар сири уларыта тутуохтара.

Оскуола 220 үөрэнээччигэ ананар, 5-11 кылаастар, ити эрээри быйылгы бастакы ылыы 7, 8 уонна 10 кылаастары эрэ хабыаҕа. Быраабылалары Айсен Николаев сорудаҕынан кэлэр ыйга таһаарыахтара.

«Олунньуга оскуолаҕа ылыы быраабылалара киэҥ араҥаҕа биллэриллиэхтээх. Манна эксээмэннэр түмүктэринэн бастыҥтан-бастыҥнар үөрэниэхтээхтэр. Биһиги сыалбыт — норуоттар икки ардыларынааҕы Арктика оскуолата сотору кэминэн норуоттар икки ардыларынааҕы бакалавриат систиэмэтинэн үлэлиирэ буолар», — диэн кэпсээтэ өрөспүүбүлүкэ баһылыга.

Оскуолаҕа оҕолор сүрүн предметтэри таһынан искусство уонна технология модулларын үөрэтиэхтэрэ, эбии спортивнай секцияларга дьарыктаныахтара. Норуоттар икки ардыларынааҕы бакалавриакка үөрэтиигэ аккредитацияны 2023 сылга ылар сорук турар. Оччотугар бу оскуоланы бүтэрбиттэр тас дойдулар үрдүк үөрэхтэрин кыһаларыгар үөрэнэр буолуохтара.

Преподавателлэр састааптарын былырыыҥҥыттан талаллар. Үөрэх уонна наука миниистирэ Владимир Егоров эппитинэн, биир бастакы ирдэбилинэн английскай тылы билиитэ, уруогун ити тылынан ыытара буолар. Сотору түмүктүүр талыы буолуоҕа. Учууталлар сайынтан үлэлээн барыахтара.

Үөрэх балаҕан ыйын 1 күнүттэн саҕаланыаҕа.

Сиһилии бу сайт-ка билсиҥ.

Следите за самым важным и интересным в Telegram-канале и WhatsApp-группе ЯСИА