Олунньуга режиссер Дмитрий Давыдов «Кинотавр» бириэмийэтин ылбыт «Пугало» киинэтэ дойду бары киинэ тыйаатырдарыгар көстүө.
Арассыыйа биллэр киинэ кириитигэ Антон Долин НВК «Саха» ханаалыгар «Якутия Live» биэриигэ киинэни «Искусство кино» диэн дойду биир кырдьаҕас сурунаала уонна тутулуга суох киинэни прокаттыыр «Про:взгляд» тэрилтэ өйүүллэрин иһитиннэрдэ.
«Киинэни дойду бары улахан куораттарыгар көрдөрөр санаалаахпыт. Дьон голливуд, Арассыыйа улахан бүддьүөттээх киинэлэрин тэҥэ артхауснай, азиатскай, европейскай киинэлэри сэҥээрэр. Онон «Пугало» дьон интэриэһин тардар ини диэн эрэнэбит», — диэтэ Антон Долин.
Киинэ кириитигэ саха киинэтэ фестивальнай уонна блокбастердар ыккардыларыгар туһаныллыбакка сылдьар араҥаны баһылыан сөп диэн этэр. «Дьон киһини толкуйдатар киинэни сэҥээрэр. Онон итиннэ саха киинэтэ бэйэтин миэстэтин булар кыахтаах», — диир Долин.
