Үлэҕэ, социальнай сайдыыга министиэристибэ тутаах үлэһиттэрэ Өрөспүүбүлүкэ күнүгэр дьону кыттан көрсөн кинилэр мунаарар ыйытыктарыгар хоруйдаатылар, сүбэлэри-амалары биэрдилэр.
Үлэҕэ уонна социальнай сайдыыга министиэристибэтигэр өрөспүүбүлүкэ нэһилиэнньэтин кытта көрсүһүү күнэ биллэриллибитэ.
Сарсыарда лоп курдук 8 чаастан миниистир Александр Дружинин, саҥа анаммыт миниистири бастакы солбуйааччы Степан Москвитин, министиэристибэ үлэһиттэрэ дьону болдьоммут чаастарыгар көрсөн кэпсэтэн бардылар. Дьон үксэ социальнай дьиэни ылыыга, үлэни булан биэриигэ көмө көрдөөн кэлбиттэр.
Дьону көрсүһүү 12 чааска түмүктэннэ, барыта бу күн 19 араас кыһалҕалаах киһи сырытта. Маны таһынан өрөспүүбүлүкэ олохтоохторугар анаан видео-конференц-связь, видеосвязь, аудиосвязь режимэ үлэлээтэ.
