Хас оҕолоохторуттан тутулуга суох, оҕолоох дьиэ кэргэн барыта учуокка ылыллыаҕа. Ити туһунан Үлэ, социальнай сайдыы миниистирин солбуйааччы Татьяна Степанова министиэристибэ Тааттааҕа ыытыллыбыт көһө сылдьар коллегиятын кэмигэр эттэ. Манна Саха сирин баһылыгын саҥа уурааҕын ырыттылар.
Өрөспүүбүлүкэ баһылыга Егор Борисов «Саха сиригэр оҕолоох ыалы өйөөһүҥҥэ эбии миэрэлэр тустарынан» уурааҕа быйыл муус устар 28 күнүгэр тахсыбыта.
Миниистири солбуйааччы этэринэн, оҕолоох ыал олоҕун таһымын кыраҕытык ырытыахтара. Биэдэмистибэ персонифицированнай учуокка ылар информационай систиэмэни оҥорууну саҕалаабыт.
«Бу биир кэлимсэ систиэмэҕэ оҕолоох дьиэ кэргэн барыта киириэҕэ. Толорута суох, инбэлиит оҕолоох эбэтэр инбэлиит төрөппүттээх, оҕону иитэ ылбыт дьиэ кэргэттэр туспа критерийгэ хапсаллар. Ону таһынан көһө сылдьар дьиэ кэргэн, о.д.а. критерийдэрин оҥоруохпут», — диир Татьяна Степанова. Информационнай комплекска олоҕуран чопчу аадырыстаммыт социальнай көмө оҥоһуллуоҕа.
Татьяна Иннокентьевна оҕолоох ыалга баар көмө туһунан сиһилии эттэ. Холобур, Ийэ өрөспүүбүлүкэтээҕи хапытаалыттан 15 тыһ.солк. уу харычынан биэрии, 10 уонна онтон элбэх сокуоннай саастарын ситэ илик оҕолоохтор дьиэ тутталларыгар биир кэмнээх социальнай төлөбүр тустарынан кэпсээтэ. Кыаммат-хотуммат ыалга эбии көмөнү оҥоруу туһунан уураах бырайыага билигин сөбүлэһии чэрчитигэр сылдьарын кини эттэ.
Үлэ, социальнай сайдыы миниистирэ Александр Дружинин улуустарга ураты болҕомто уурулларын ыйда.
