Госдуума дьокутаата Галина Данчикова уонна Ил Түмэн Бэрэссэдээтэлин солбуйааччы – Ил Түмэн бүддьүөккэ, үпкэ, түһээн уонна сыана бэлиитикэтигэр, бас билии уонна приватизация боппуруостаргар сис кэмитиэтин бэрэссэдээтэлэ Юрий Николаев бу күннэргэ Мииринэйгэ үлэлииллэр.
– Элбэх өҥөнү оҥорор киин үлэтин билсиһии кэнниттэн норуот дьокутааттара Юрий Николаевы, Николай Наттосовы, улуус дьаһалтатын уонна биэдэмистибэлэр, АЛРОСА итиэннэ тиэйэр-таһар тэрилтэлэр бэрэстэбиитэллэрин кытары улууска аһылык табаардарын уу суолунан аҕалтарыы туһунан кэпсэттибит, – диэтэ Галина Данчикова.
Бу көрсүһүү Галина Данчикова көҕүлээһининэн бэс ыйыгар Тырааныспар федеральнай министиэристибэтигэр ыытыллыбыт суһал мунньах салгыытын курдук тэрилиннэ. Саҥа киллэриллибит уу тырааныспарын эбийиэктэрин куттала суох буолуутун тиэхиньиичэскэй регламенын толоруу чэрчитинэн кэпсэтии барда. Тоҕо диэтэххэ, бу докумуон суоппар-экспедитордар пассажирдары таһарга көҥүлэ суох уу аалларыгар таһаҕаны арыаллыылларын бобор, суруйда Саха парламент саайт.
– Мииринэйдэр таһаҕаһы таһыыны хааччыйарга үс варианы этэллэр, олор хас биирдиилэрэ төһө көдьүүстээхтэрин үөрэтэр итиэннэ уһаппакка быһаарар ирдэнэр, – диэтэ Госдуума дьокутаата диэн Ил Түмэн пресс-сулууспата иһитиннэрдэ.
