Балаҕан ыйын 25 күнүгэр Ньурбаҕа «Кыталык» култуура дыбарыаһыгар «Улахан кыахтар сайыннара — 2027» диэн урбаанньыттар уонна туризм күннэригэр анаммыт быыстапка-дьаарбаҥка буолла. Араас нэһилиэктэртэн кыттааччылар олохтоох маастардар оҥоһуктарын уонна сувенир бородууксуйатын көрдөрдүлэр, суруйда Саха парламент саайт.
Быыстапкаҕа Үөдэй нэһилиэгин «Айылгы» норуот айымньытын дьиэтин дириэктэрэ Надежда Аммосова, уус-уран салайааччы Марфа Федорова, бибилэтиэкэр Наталия Крылова уонна спорт бэтэрээнэ Юрий Николаев көрдөрдүлэр.
Саҥа оҥоһуктартан биирдэстэрэ — нэһилиэк брендинэн буолбут, 3D-принтерга оҥоһуллубут «Балбаара» пааматынньык кыракый куоппуйата. Ону таһынан үөдэйдэр учуутал Мариника Федорова оҥорбут аккырыыкка кэмпилиэктэрин, кинигэ сирэйин бэлиэтиири уонна брелоктары аҕалбыттар.
«Балбаара» оҥоһук Үөдэй нэһилиэгиттэн төрүттээх, Саха сирин биллэр судаарыстыбаннай уонна бэлитиичэскэй диэйэтэлэ Варвара Андреевна Петроваҕа анаммыт. Кини САССР Үрдүкү Сэбиэтин уонна Саха Өрөспүүбүлүкэтин Судаарыстыбаннай Мунньаҕын (Ил Түмэн) дьокутаата этэ, 1995 сылтан 2003 сылга диэри Ньурба улууһун салайбыта. Үөдэйгэ киниэхэ пааматынньык туруоруллубут, кини аатынан олохтоох оскуола-оҕо саада ааттаммыт.
2027 сылга Ньурбаҕа Саха сирин норуоттарын IX Спортивнай оонньуулара ыытыллыаҕа. Бу тэрээһиҥҥэ Үөдэй нэһилиэгэр сувенир бородууксуйатын арааһын кэҥэтэр былааннаахтар.
— Былаан уонна өйүк элбэх. Оскуола, кулууп уонна дьаһалта кэлэктииптэрэ эппиэтинэстээх тэрээһиҥҥэ бэлэмнэниигэ көхтөөхтүк кыттыахтара. Сувенир бородууксуйатын таһаарыыны эрэ буолбакка, нэһилиэк сирин-уотун тупсарыыны эмиэ дьүүллэһиэхпит. Ыалдьыттары көрсөргө таҥас тигиллиэҕэ, бэчээт бородууксуйата бэлэмнэниэҕэ. Үөдэй олохтоохторо эмиэ пуонда хаҥатыыга кылааттарын киллэрэр былааннаахтар, — диэн нэһилиэк баһылыга Мария Николаева кэпсээтэ.
Мария Пудовна «Нэһилиэк хаһаайката» диэн интервьютугар Варвара Андреевна Петрова пааматынньыгын аттыгар баар искибиэри тупсарыы былааннарын туһунан кэпсээбитэ. Билигин улуу киһилэрин уобараһын сувенир бородууксуйатыгар киллэрэн, Үөдэй нэһилиэгин биир биллэр бэлиэтинэн оҥордулар.
Онон Ньурба улууһун саамай кыра нэһилиэктэриттэн биирдэстэрин олохтоохторо кэлэр Оонньууларга бэлэмнэниигэ кытыннылар. Сири-уоту тупсарыы, ыалдьыттары көрсүү уонна олохтоох сувенир бородууксуйатын салгыы сайыннарыы үлэтэ салҕанар.
Тылбаас: Артур Харбаев
