28 Кулун тутар 28.03
  • -11°
  • $ 92,59
  • 100,27

Дьааҥы улууһугар сүөhү ахсаанын энчирэппэт сорук турар

17:01, 12 октября 2020
Текст:
Читайте нас на
Яндекс Новости
ЯДВ

Саха сирин Аартыкатын 13 улууhугар Дьааҥы оройуона ынах сүөhү 48%-нын, сылгы 49% — нын ылар. 2020-2021 с.с. улуус бары хаhаайыстыбаларыгар, холбоон 2603 ынах сүөhү, ол иhигэр 1217 ыанар ынах кыстаан тахсыахтааҕа былааннанар. Бу туһунан улуус баһылыгын солбуйааччы Михаил Осипов тыа хаһаайыстыбатын боппуруостарыгар анаммыт мунньахха иһитиннэрдэ.


Улуус тыатын хаhаайыстыбатын саламтатын солбуйааччы Дмитрий Габышев, дакылаат сүнньүнэн, чуолаан — СӨ  2010 с. ахсынньы 15 күнүнээҕи  N881_З_ N 639–IV сокуонугар киирбит уларыйыылары, тыа хаhаайыстыбатыгар судаарыстыба көмөтүн, үүттэн оҥоhуллар бородууксуйаны оҥорон таhаарыы тустарынан иhитиннэрдэ.

Михаил Осипов Верхоянскай куоратыгар 268 ынах сүөhүнү иитэн туруорар «Алгыс» ТХПК 2021 с. тохсунньу маҥнайгы күнүгэр 104% сүөhүнү туруорар былааннааҕын иһитиннэрдэ. Маны таһынан кини үтүө көрдөрүүлээх нэһилиэгинэн Сартаҥы ааттаата. 2018 сыллаахха манна 279 ынах сүөhү баар эбит буоллаҕына, билигин 118 төбөннөн (17,7%) элбэх. 2021 с. тохсунньу маҥнайгы күнүгэр сартаҥнар сүөһүлэрин ахсаанын 397 төбөҕө тиэрдэр соруктаахтар.

Мунньах түмүгүнэн үүммүт кыстыкка ынах сүөhү ахсаанын 96-97% диэри тиэрдэри былааннаатылар. Маны таhынан, сүөhү элбииригэр туhааннаах сүрүн боппуруос көтөҕүллэн, «атыыр оҕустары тутууга муниципальнай үбү көрүү» соруга туруорулунна.

Ааспыт сылга айылҕаҕа ыксаллаах быhыы үөскээн, оттооhуҥҥа мэhэйдэр тахса сылдьыбыттара. СӨ Бырабыыталыстыбата, тыа хаhаайыстыбатын министиэристибэтэ өйөбүллэринэн от, сүөhүгэ эбии аhылык тиэллэн уонна Дьааҥы дьоно сыралаах үлэлэрин түмүгүнэн улуус тыатын хаhаайыстыбата кыhыны этэҥҥэ туораабыта.
Оройуон быйыл да сүөhү ахсын энчирэппэккэ кыстыгы үчүгэйдик туоруурга соруктары туруорар.

Санатабыт, быйыл Дьааҥы улууһугар тыа хаhаайыстыбатын сыла биллэриллибитэ.

Следите за самым важным и интересным в Telegram-канале и WhatsApp-группе ЯСИА