Дьокуускай куорат «Остуоруйа дойдута» диэн 39 №-дээх оҕо саадыгар оҕону иитиигэ-үөрэтиигэ ананар үлэ куруук сэргэхтик ыытыллар. Кырачааннар оонньуурдары, аккырыыккалары бэйэлэрэ оҥорон, эҥинэ бэйэлээх хартыыналары уруһуйдаан төрөппүттэригэр бэлэхтииллэр, үтүө санааланыы тэрээһиннэригэр кытталлар, өрөспүүбүлүкэҕэ, Арассыыйаҕа ыытыллар куонкурустарга ситиһиилэнэллэр.
Соторутааҕыта бу оҕо саадын кырачааннара Саҥа Дьылы көрсө харыйа симэҕин оҥорбуттарын туһунан оҕо саадыгар эбии үөрэхтээһин педагога Любовь Федорова кэпсиир:
—Бу оҕо саадыгар «Умелые ручки» диэн устуудьуйа үлэлиир. Манна оҕолор уруһуйдууллар, оонньуур арааһын оҥоро үөрэнэллэр. Быйыл Саҥа дьылы көрсө харыйаҕа оонньуурдары оҥордубут уонна хас биирдии оҥоһукпутугар харысхал бэлиэлэрин сыһыардыбыт. Маны барытын үтүө санааланыы чэрчитинэн ыытыллыбыт «Подари детям оберег» аахсыйаҕа кыттыһаммыт, Сайсары уокурукка илдьэн туттардыбыт. Оҕолорум барахсаттар ис сүрэхтэриттэн кыһанан-мүһэнэн оҥордулар, — диир Любовь Иннокентьевна.
Тэрээһин «Харысхал» үтүө санааланыы пуонда тэриллибитэ биэс сылынан ыытыллыбыт. Маныаха доруобуйаларынан аһаах оҕолор чэгиэн буолалларыгар сирдиир, эрэл санааны күүһүрдэр сыаллаах-соруктаах ыытыллар аахсыйа дьон-сэргэ болҕомтотун улаханнык тардыбыт. Тэрийээччилэр «Харысхал аптаах дойдута» диэн Саҥа дьыллааҕы бырааһынньыкка оонньуурдары оҕолорго туттарыахтаахтар.
