14 От ыйа 14.07
  • 26°
  • $ 87,74
  • 95,76

Ыксаа! Тайах куотта…

15:15, 18 апреля 2016
Текст:
Читайте нас на
Яндекс Новости
ЯДВ

Сааскы сайыаҕа булчут бастаан утаа тоҥуу хаар үрдүгэр уйдарыах курдук буолла, онтон батарыта түстэ, аҥар саппыккыта уһулунна, иккиһэ аара хаалла. Ийэ-хара көлөһүнэ сарт түстэ. Ээ чэ, — диэн баран наскынан сүүрэн элээрдэ, кынаттаммыт курдук буолла.


Ити курдук тыҥааһыннаах күрэхтэһии Байанай күнүгэр Томпо улууһун, номоххо кэпсэнэринэн, Саһыл Бытык баатыр төрүттээбит нэһилиэгэр буолла. Манна саха улахан нэһилиэктэрин сорсуннаах булчуттарабыт дэнэр эр бэртэрэ муһуннулар. Байаҕантай, Мэҥэ Алдан уонна олохтоохтор икки хамаандалара күөн-көрүстүлэр.

Байаҕантай уран тыллаах алгысчыта Юрий Кузьмин бу көрүҥҥэ кыайда. Онтон эр ылан туут хайыһарынан, дулҕалаах сиринэн, бэрэбинэн, тоҥуулаах хаар устун сүүрэр, сыал ытар түһүмэхтэрдээх эстафетаҕа 2 мүн.7,21 сөк. биэтэккэ кэлэн байаҕантайдар эмиэ бастаатылар. Мэҥэ Алдан дьоно атахтарын таҥаһа хаалыар дылы сүүрдүлэр да хоттордулар.

МЦ сааны Саһыл – 1 хамаандаттан Афанасий Мярин 1 мүн. 22,4 сөк. иһигэр ыһан баран хомуйан тэҥнээҕин булбата. Уот отторго бэрэбинэни илиинэн эрбээһиҥҥэ эмиэ байаҕантайдар Юрий Кузьмин уонна Семен Колодезников бастаатылар. Кинилэр сорудаҕы 1 мүн. 31.42 сөк. толордулар.

Дьиэлээхтэр хайа муҥун, аһары ыалдьытымсыйан кыайтарар буоллубут диэн туох баардарынан түһүннүлэр. Турар маһы Альберт Петров 25.41 сөк. кэрдэн кыайыы үөрүүтүн биллэ. Ойбону анньыынан алларыыга эмиэ Саһыл – 1 хамаандата бастаата. Бириэмэтэ 6 мүн. 13,04 сөк. «Туруоххут дуо? Бачча бэйэлээх ойбоннорго үтүмэх ханнаный диэн?» — буолла.

Сылайан-элэйэн баран булчут отуутугар итии чэйи иһэр саҕа үчүгэй туох баар буолуой? Ол туһугар уолаттар дьэ хамсана түстүлэр ээ. Уот ылаары ким хаары, мууһу кэрэйбэккэ сиргэ сытар, ким испиискэтин барытын уокка симэр. Афанасий Мярин уота балачча умайан эрдэҕинэ биэдэрэлээх уутун оргута охсоору курткатын уһулла да онон сабаан күөртээн биэрдэ. Сорох кыттааччылар үтүктэ оҕустулар, дьахтар көрөөччү өртө таҥаһын уокка сиэтэр буолла диэн аймаластылар. Тоҥон өлөөрү гыннахха онноооҕор буолуоҕу харыһыйбаккын. Биэдэрэлээх уу оргуйан бидилийдэ.

Баай Байанай байаҕантайдарга бастакы миэстэни бэлэх уунна. Кыайыылаахтарынан нэһилиэк баһылыга Яков Степанов, Юрий Кузьмин, Михаил Стручков, Николай уонна Семен Колодезниковтар, Рональд Аммосов, Алексей Руфов буоллулар. Иккис — Саһыл – 1, үһүс — былырыыҥҥы чемпион Мэҥэ Алдан, төрдүс — Саһыл эдэр ыччатын хамаандата буоллулар. Уопсай түмүккэ уонна көрүҥнэринэн кыайыылаахтарга мэтээллэри, грамоталары, бириистэри туттардылар.

Петр Новгородов, улуус баһылыгын социальнай боппуруостарга солбуйааччы:

— Бүгүн кыайтарбыт диэн суох. Ыраас салгыҥҥа сылдьан, күрэхтэһэн бары кыайыылаах буоллубут. Кыайыылаахтарга эрэ буолбакка, тэрийээччилэргэ: Саһыл нэһилиэгин дьаһалтатыгар, кулуубугар, оскуолатыгар, биирдиилээн дьоҥҥо уонна кылаабынай судьуйа Николай Андросовка грамоталары туттардыбыт.

Следите за самым важным и интересным в Telegram-канале и WhatsApp-группе ЯСИА