Санкт-Петербург куоракка Балтийскай собуокка «Саха сирэ» диэн үс сериялаах атомнай ледокола ууга үөрүүлээх түһүүтэ буолла. Бу күн «Урал» ледоколга Арассыыйа былааҕын көтөхтүлэр. Арассыыйа бэрэсэдьиэнэ Владимир Путин тэрээһиҥҥэ видеосибээс нөҥүө кыттыыны ылла диэн кэпсиир.
«Бүгүн биһиги дойдубут суудуналары тутуутугар уонна ледокольнай флотпутугар икки чаҕылхай уонна суолталаах түгэн буолла. Тоҕо диэтэххэ, бу икки улахан комплекснай соругу быһаарыы эрэ буолбакка, улахан бырайыак чэрчитинэн буолла. «Урал» диэн саҥа универсальнай атомнай ледоколга Арассыыйа судаарыстыбаннай былааҕа өрө көтөҕүллүөҕэ. Өссө биир күүстээх, аныгы атомнай «Якутия» ледокол ууга түһэрэргэ бэлэм. Эһигини барыгытын бу бэлиэ түгэнинэн эҕэрдэлиибин», — диэтэ Владимир Путин.
“Якутия” универсальнай атомнай ледокол — 22220 бырайыак төрдүс суудуната, үлэ 2020 сыл ыам ыйыттан саҕаламмыта. Суудуна “Атомфлот” ФГУП-“Росатом” судаарыстыбаннай корпорация тэрилтэтин сакааһынан тутуллар. Атомоход уһуна — 173,3 миэтэрэ, кэтитэ – 34 миэтэрэ. 22220 бырайыак дэгиттэр атомнай ледоколлар — аан дойдуга саамай улахан уонна күүстээх суудуналар. Кинилэр сүрүн соруктара – Арктика арҕаа оройуонугар навигация сылы быһа ыытыллыытын хааччыйыы. Бу бырайыак суудуналара чугастааҕы сылларга Арассыыйа гражданскай ледокольнай флотун төрүтүнэн буолуохтаахтар.
