17 От ыйа 17.07
  • 20°
  • $ 88,28
  • 96,26

Уус-Алдаҥҥа Тустуу күннэрэ ыытылыннылар

11:53, 08 февраля 2016
Текст:
Читайте нас на
Яндекс Новости
ЯДВ

Уус Алдан тустууга уонна хапсаҕайга федерациятын үлэтин дьүүллээһиигэ иһитиннэриилэри тустуу федерациятын толорооччу дириэктэрэ Иван Ноговицын, улуус хамаандатын сүрүн тренерэ Иван Пантилов, «Дороги Усть Алдана» тэрилтэ салайааччыта Геннадий Сивцев, хапсаҕайга улуустааҕы федерация салайааччыта Владимир Богдашин, Уус Алдан спорка кэмитиэтин бэрэссэдээтэлэ Константин Давыдов, тустуу федерациятын салайааччытын бастакы солбуйааччы Афанасий Заболоцкай, Россия үтүөлээх тренерэ Василий Стручков уо.д.а. оҥордулар.
Федерация мунньаҕын сүнньүнэн Уус Алдан улууһун баһылыга, тустуу федерациятын салайааччы Алексей Васильевич Федотов кэккэ этиилэри оҥорон туран, тустуу тула өссө түмсүүлээх буоларга ыҥырда.

Сарсыныгар, олунньу 7 күнүгэр, Бороҕоҥҥо үһүс сылын субуруччу Уус Алдан улахан дьоҥҥо көҥүл тустууга биирдиилээн уонна хамаанданан бастыыр иһин чемпионата ыытылынна. Николай Тарскай аатынан спорт комплексыгар тэлгэммит икки көбүөргэ барыта 94 бөҕөс 13 нэһилиэк чиэһин көмүскээтэ.

Чемпионаты үөрүүлээхтик арыйыыга хапсаҕайга спорт маастара, бэтэрээннэргэ Россия уонна аан дойду түһүлгэлэригэр эриэ-дэхси көрдөрүүлээх Вадим Даниловы үйэ аҥардаах үбүлүөйүнэн эҕэрдэлээһин буолла.

Сытыы хапсыһыылар түмүктэригэр бэйэлэрин ыйааһыннарыгар бастаатылар: 52 кг — Дмитрий Петухов, 57 кг — Афанасий Вензель, 61 кг — Виталий Эспек, 65 кг — Сергей Бурнашев, 70 кг — Ваир Бурцев, 74 кг — Айсен Копырин, 86 кг — Арсентий Николаев, 97 кг — Алексей Андросов, 125 кг — Семен Семенов. Хамаанданан кыайыыны Бороҕон нэһилиэгэ (баһылык Василий Алексеев) ситистэ.

Уус Алдан баһылыга, тустуу улуустааҕы федерациятын салайааччыта Алексей Федотов:

— Көҥүл тустууга улуус чемпионатын бэлэмнээн, тэрийэн ыытыыбыт сүрүн соруга – тустууга интэриэһи үөскэтии, оҕолору угуйуу уонна тренердэр үлэлэрин көҕүлээһин буолар. Үс сыллааҕыта ылыммыт бырагыраамабыт быһыытынан тренерскэй састаабы аттаран туруоруу, биирдиилээн талааннаах оҕолорбутугар көмө үлэтэ барда. Бастатан туран, кыра саастаах уолаттарга сүрүн болҕомто ууруллубута. Ол түмүгэр билигин өрөспүүбүлүкэ таһымыгар бириистээх миэстэҕэ син киирэр буоллубут. Боотурдар оонньууларыгар, Д.Данилов кэриэһигэр күрэхтэһиигэ, В.Гоголев бирииһигэр түһүлгэҕэ эриэ-дэхси көрдөрүүлэннибит.

Күүстээх тустууктарбыт – Россия уонна аан дойду таһымыгар тахсалларыгар көмөнү өссө даҕаны оҥорор былааннаахпыт. Онон сотору кэминэн Уус Алдан тустуута бэйэтин үтүө аатын төннөрүө дии саныыбын. Ситим быстыбат, бэтэрээннэрбитин кытта ыкса сибээстээхтик үлэлиибит. Тустан бүппүт уолаттарбыт үлэ булалларыгар, тренер үлэтигэр сысталларыгар, атын даҕаны эйгэҕэ бэйэлэрин булалларыгар үлэ ситимнээхтик барар. Аҥардас көбүөргэ үлэнэн, көбүөргэ ситиһиинэн эрэ буолбатах. Тустууктар ону ылынар буоллахтарына, дойдуларын туһугар улуустарын чиэһин көмүскүүргэ күүскэ турунуохтара диэн саныыбын.

Сахаларга саамай биһирэнэр спорт көрүҥүнэн биллэн турар көҥүл тустуу буолар. Биһиги Уус Алдан чемпионатын тэрийэн ыытарбытыгар дьон-сэргэ санаата уһугунна. Онон атын улуустар бу маннык тэрээһиннэри эмиэ бэйэлэригэр тэрийэн, тустуу таһыма үрдүүрүгэр кыттыһалларыгар баҕарабын.

Следите за самым важным и интересным в Telegram-канале и WhatsApp-группе ЯСИА