18 От ыйа 18.07
  • 18°
  • $ 88,09
  • 96,3

Томпоҕо арыгыны атыылыырга сокуону кэһээччилэри буруйга тардаллар

18:01, 01 июня 2016
Текст:
Читайте нас на
Яндекс Новости
ЯДВ

Быйыл Томпо улууһугар арыгыны атыылыырга сокуону кэһиигэ икки түбэлтэни полиция үлэһиттэрэ буллулар.


Муус устар ыйга улуус киинигэр – Хаандыга бөһүөлэгэр — киэһэ 8 чаас ааспытын кэннэ маҕаһыын атыыһыта дьахтар арыгыны атыылаабытын туппуттара. Бу түбэлтэни арыйыыга полиция хас да сотруднига кыттыбыта. Атыыһыт 14,2 ыстатыйанан буруйга тардыллан 1,5 тыһ. солк. ыстарааптанар буолла. Маҕаһыыны бас билээччи эмиэ буруйданыа.

Ыам ыйыгар улуус кииниттэн 70 км сиргэ баар Теплай Ключ сэлиэнньэтигэр олорор дьиэҕэ икки бытыылка водканы көҥүлэ суох атыылаабыт киһини туппуттара. Сокуону кэһиини туоратарга холуобунай розыск начальнига, старшай лейтенант Илья Гладаревскай, участковай уполномоченнайдар начальниктара, майор Павел Тарабукин кыттыбыттара. Бу түгэҥҥэ атыылааччы эмиэ 14,2 ыстатыйанан буруйга тардыллыа.

Майор Павел Тарабукин, участковай уполномоченнайдар начальниктара:

Кэннэки кэмҥэ арыгыны атыылыыр маҕаһыыннар аҕыйаатылар. Ол курдук Теплай Ключка, Сайдыыга, Кэскилгэ, Тополинайга арыгы атыылыыр маҕаһыыннар суохтар, атын сэлиэнньэлэргэ биирдии баар. Хаандыгаҕа да урукку курдук буолбатах. Биһиги маҕаһыыннары былаан быһыытынан бэрэбиэркэлиибит эбэтэр биллэрии киирдэҕинэ. Былырыын сокуону кэһии биэс түбэлтэтин туппуппут. Ол иһигэр Хаандыгаҕа сокуоннай сааһын ситэ илик оҕоҕо биир бытыылка пиибэни атыылаабыттарын туппуппут, тэрилтэ 20 тыһыынча солкуобайга ыстарааптаммыта.

Следите за самым важным и интересным в Telegram-канале и WhatsApp-группе ЯСИА