Саха сирэ Уһук Илин 2036 сылга диэри социальнай-экэнэмиичэскэй сайдыытын тосхолун олоххо киллэрии Былааныгар киллэрэргэ бэйэтин саамай улахан инфраструктурнай уонна технологическай көҕүлээһиннэрин көрдөрүөҕэ. Бу боппуруос Уһук Илин бэдэрээлинэй уокурук Сэбиэтин мунньаҕар дьүүллэһилиннэ, мунньаҕы Арассыыйа Бырабыыталыстыбатын Бэрэссэдээтэлин солбуйааччы — РФ Бэрэсидьиэнин Уһук Илин бэдэрээлинэй уокурукка боломуочуйалаах бэрэстэбиитэлэ Юрий Трутнев салайан ыытта, диэн «Якутия 24» sakha.gov.ru сигэнэн иһитиннэрэр.
Арассыыйа Бырабыыталыстыбатынан бигэргэммит тосхолу олоххо киллэрии быраактыкатыгар киирдэ. Тэрээһиннэр Былааннара 2027 сыл кулун тутар 1 күнүгэр диэри бэлэм буолуохтаах. Уһук Илин сайдыытын миниистирэ Алексей Чекунков этэринэн, докумуон толору сыыппаралаах уонна кээмэйдэнэр түмүктэргэ туһаайыллыахтаах, ол сыллата сайдыыны кэтээн көрөргө кыаҕы биэриэҕэ.
«Биһиги кумааҕы үлэтин кыччатыахпыт уонна Былааны бары эрэгийиэннэри, салаа министиэристибэлэри, урбааны уонна сайдыы институттарын кытары бииргэ тутуохпут. Биһиги сыалбыт — тосхолу олоххо киллэриини быраактыкаҕа туһаайыллыбыт үлэҕэ кубулутуу, дьон сыллата чопчу түмүгү көрөрүн курдук», — диэн кини үлэ маастар-былааннары салайар сыыппара систиэмэтин ситиһиилээх уопутугар олоҕурарын бэлиэтээтэ.
Саха сирин баһылыга Айсен Николаев өрөспүүбүлүкэҕэ инникилээн тутуллар хайысхаларын ыйда. «Саха сирэ бу Былааҥҥа тырааныспар уонна энэргиэтикэ инфраструктуратын, бырамыысыланнаһы уонна саҥа технологиялары, доруобуйа харыстабылын, үөрэҕириини уонна дьиэ кэргэни өйөөһүнү сайыннарыы быһаарыыларын киллэрэргэ этии киллэриэҕэ. Бу барыта өрөспүүбүлүкэ салгыы сайдыытыгар уонна дьон олоҕун хаачыстыбатын үрдэтиигэ усулуобуйалары тэрийиэхтээх», — диэн Ил Дархан тоһоҕолоон бэлиэтээтэ.
Бэдэрээлинэй Былааҥҥа бүтүн макро-эрэгийиэҥҥэ стратегическай суолталаах бырайыактары киллэрэр былааннаахтар: Өлүөнэ муостатын тутуу; Ньайба сэлиэнньэҕэ дириҥ ууга аналлаах терминалы тэрийии; Новоленскэй уонна Саха сирин Соҕуруу өттүгэр ТЭС-ры тутуу, ону тэҥэ Дьокуускайдааҕы ГРЭС-2 кыамтатын кэҥэтии; минерал-сырьевой кииннэри баһылааһын; оҥоһуу өйү сайыннарыыга аналлаах энергияны көдьүүстээхтик туһанар даннайдары оҥорон таһаарар киини тэрийии.
Саха парламент саайтан тылбаастаата Артур Харбанов
