От ыйын 5 күнүгэр, Кэбээйи улууһугар Олоҥхо ыһыаҕын түмүктүүр күнүгэр, өрөспүүбүлүкэ Олоҥхо дьиэлэрин исписэлиистэрэ Саха сирин норуоттарын былыргы сиэрдэрин-туомнарын көрдөрдүлэр. Кинилэр өбүгэлэрбит — сахалар уонна хотугу норуоттар — иччилэргэ сүгүрүйүүлэрин, оҕо төрүүрүн көрсүүлэрин, уолу боотур буолан тыыллан-хабыллан тахсыытыгар такайыыларын, эдэр ыалга алгыһы көрдөрдүлэр.
Арктика киинин эпическэй нэһилиэстибэ салаатын салайааччыта Евдокия Иванова ЯСИА-ҕа кэпсээбитинэн, былыргы сиэрдэри-туомнары көрдөрөргө өрөспүүбүлүкэ уон Олоҥхо дьиэтин кэлэктииптэрэ кыттыбыттар. Үлэһиттэр көстүүмнэри уонна маллары бэлэмнээбиттэр. «Олоҥхо дьиэлэрин исписэлиистэрэ өрүс уонна сир иччилэригэр сүгүрүйэр сиэрдэри-туомнары, кымыс ыһыытын ыыттылар. Ону тэҥэ сайыны көрсөр уонна от үлэтигэр киирэр сиэрдэри-туомнары көрдөрдүлэр.
Нам улууһун исписэлиистэрэ оҕо төрөөһүнүгэр былыргы сиэри-туому уонна саха норуотугар 16–17 саастаах уолаттарга боотур буолууга анаан ыытыллар сиэри-туому көрдөрдүлэр. Үөһээ Бүлүү улууһун Олоҥхо дьиэтэ эһэни бултуох иннинэ иччигэ сүгүрүйэр сиэри-туому көрдөрдө.
Маны таһынан, былыргы үгэһинэн кымыс күүгэнин бычылытар күрэхтэһиини ыыттылар, аҕыс хотун-дьахтар кытынна. Саамай элбэх күүгэни таһаарбыт кыайда. Бу сиэр-туом эдэр ыаллар дьоллоох-саргылаах олохторун туһугар ыытылынна. Тиһэх тэрээһининэн ыал буолуу сиэрэ-туома буолла. Биһиги төрүт сиэрдэри-туомнары кэпсии эрэ буолбакка, көрдөрөн, эдэр көлүөнэ ону билэрин, тутуһарын баҕарабыт», — диэн Евдокия Иванова кэпсээтэ.
