Саха сиригэр ыам ыйын 16 күнүгэр мас көтөрүгэр булт болдьоҕо түмүктэннэ. Уу көтөрүгэр булт илин эҥэр уонна киин улуустарга ыам ыйын 20 күнүгэр, оттон Горнай уонна Бүлүү бөлөх улуустарыгар ыам ыйын 23 күнүгэр тохтуур.
Бу туһунан Саха Өрөспүүбүлүкэтин экологияҕа, айылҕаны туһаныыга уонна ойуур хаһаайыстыбатыгар министиэристибэтин Булт департаменын салайааччыта Владимир Решетников социальнай ситимнэргэ иһитиннэрдэ.
Сезон түмүктэммитин кэнниттэн бутуурга көҥүлү 20 хонук иһигэр докумуону ылбыт сиргэр төннөрүөхтээххин. Бу кэм устата хонтуруоллааһын салгыы үлэлиир.
Салайааччы булчуттарга сэрэхтээх буолары санатта: билигин өрүстэргэ халаан уута кэлэн, балаһыанньа сэрэхтээх буолуон сөп. «Халаан кэмигэр сэрэхтээх буоларгытыгар көрдөһөбүт. Дьон мууска хаайтаран, арыыларга хаайтаран, быыһыыр сулууспаны ыҥыраллара бэлиэтэннэ», — диэтэ Решетников.
