Саха сиригэр муус устар 14 күнүгэр бүтүн Арассыыйатааҕы үлэ дьаарбаҥката «Работа России. Время возможностей» буолуоҕа. 60- тан тахса бөдөҥ тэрилтэ баар вакансияларын биллэриэҕэ, диэн СИА-ҕа регион Үлэҕэ министиэристибэтин пресс-сулууспата иһитиннэрдэ.
Үлэ дьаарбаҥката Дьокуускайга, Алдаҥҥа, Бүлүүгэ, Ленскэйгэ, Мииринэйгэ, Нерюнгрига уонна Хаандыгаҕа ыытыллыаҕа. Үлэһиттэри көрдүүр бөдөҥ хампаанньалар ахсааннарыгар «АЛРОСА», «Золото Селигдара», «Якутуголь», «Железные дороги Якутии», «ЯТЭК», «Колмар», ону тэҥэ тырааныспар, тутуу, доруобуйа харыстабылын, быраабы араҥаччылыыр уорганнар уо. д. а. тэрилтэлэр баар буолуохтара. Дьаарбаҥкаҕа барыта 60-тан тахса тэрилтэ кыттыаҕа.
Тэрээһиҥҥэ үлэ көрдөнөр дьону, үрдүкү кылаас үөрэнээччилэрин, выпускниктары уонна үөрэх тэрилтэлэрин устудьуоннарын ыҥыраллар. Промышленнай эйгэҕэ профориентационнай турдар, үлэ биэрээччилэри уонна үөрэх тэрилтэлэрин бэрэстэбиитэллэрин кытта төгүрүк остуоллар, практическай семинардар, ордук ирдэнэр идэлэргэ маастар-кылаастар уонна да атын интэриэһинэй тэрээһиннэр ыытыллыахтара.
