Саха сирин үлэҕэ уонна социальнай сайдыыга министиэристибэтин рабочай бөлөҕө миниистири солбуйааччы Елена Теплякова салалтатынан Чурапчы улууһугар сылдьар. Үлэ министиэристибэтин бэрэстэбиитэллэрэ эпиэкэлэри уонна оҕолору иитэ ылбыт төрөппүттэри кытары көрүстүлэр уонна оҕолору иитиигэ уопуттарын, туспа олоххо бэлэмнээһиҥҥэ үчүгэй көрдөрүүлэрин бэлиэтээтилэр, диэн СИА иһитиннэрэр.
Оҕолорго кыра эрдэхтэриттэн үлэҕэ тапталы иҥэрэллэр. Кинилэр сибэккини харайарга, оҕуруот аһын үүннэрэргэ, соҕотуопкалыырга үөрэнэллэр.
Владимир уонна Анисия Сивцевтар дьиэ кэргэттэригэр кыра эрдэхтэриттэн үс кыыс иитиллэллэр. Вероника, Виктория уонна Жанна ох саанан ытыынан дьарыктаналлар, үчүгэйдик уруһуйдууллар, баайалларын сөбүлүүллэр, төрөппүт хаһаайыстыбатыгар көмөлөһөллөр.
Маны сэргэ, оройуон социальнай көмүскэлин управлениетыгар оҕолордоох ыалларга өйөбүл миэрэлэри биэрии боппуруостарын ырыттылар. Ону таһынан министиэристибэ рабочай бөлөҕө кыаммат дьиэ кэргэн аҕыйыырыгар аналлаах профилактика үлэтэ үчүгэйин сыаналаата.
