Кулун тутар 1-4 күннэригэр Дьокуускайга, “Триумф” Спорт киинигэр 1998-2000 сыллаах төрүөх уолаттар ортолоругар олимпийскай чөмпүйүөн, спорт үтүөлээх маастара, ССРС үтүөлээх тириэньэрэ Роман Дмитриев кэриэһигэр көҥүл тустууга VI норуоттар икки ардыларынааҕы турнир ыытыллар.
Турнирга Азербайджан, Болгария, Казахстан, Греция, Израиль, Казахстан, Кыргызстан, Молдова, Монголия, Румыния, Таджикистан, Узбекистан, Соҕуруу Корея хамаандалара, итиэннэ Арассыыйа регионнарыттан тустууктар кэлэллэрэ күүтүллэр. Балары сэргэ Петр Юмшанов салайааччылаах дойду уолаттарга сүүмэрдэммит хамаандата кыттыаҕа. Тэрийээччилэр Иран уонна Турция хамаандаларын кытта кэпсэтиилэри ыыталлар.
Саха сирин чиэһин бу улахан түһүлгэҕэ ини-бии Алексей, Петр Копыловтар, Георгий Кычкин, Петр Константинов, Айсен Потапов, Максим Толмачев, о.д.а. көмүскүөхтэрэ.
Роман Дмитриев кэриэһигэр көҥүл тустууга VI норуоттар икки ардыларынааҕы турнир бочуоттаах ыалдьыттарынан олимпийскай чөмпүйүөн Давид Мусульбес, Олимпиада икки төгүллээх чөмпүйүөнэ Махарбек Хадарцев, Арассыыйа үтүөлээх тириэньэрэ Магомед Гусейнов ыҥырылыннылар.
