Томпо оройуонугар СӨ тыатын хаһаайыстыбатын уонна ас-үөл политикатын миниистирэ Александр Артемьев сырытта. Тыа хаһааайыстыбатын оҥорон таһаарааччылар объектарын көрдө, үлэлэрин кытта билистэ.
Мэнэ Алдаҥҥа «Байылыат» кооператив үүтү сыаҕар, былырыын 6 мөл.солк. суумалаах грант ылбыт «Чэчир» бааһынай хаһаайыстыбаҕа сырыттылар. Хотоҥҥо 80-ча ынах кыттаан турар. Быйыл 100 төбө киирэр хотонун туттуохтаах. Агрооскуолаҕа сылдьан кэлэктииби уонна үөрэнээччилэрин кытары көрүстүлэр. Саха сиригэр 97 агрооскуола баарыгар Мэҥэ Алдан оскуолата бастыҥнарга киирсэр. Базаны бөҕөргөтүүгэ диэн тыа хаһаайыстыбатын техниката бэриллибит, учууталлар үрдэтиллибит хамнастаахтар. Онон каадырдары бэлэмнээһиҥҥэ оскуола көдьүүһэ улаатыах тустаах. Ол эрээри, олоххо буоларынан, исписэлиистэр тиийбэттэр. «Өрөспүүбүлүкэҕэ тыа хаһаайыстыбатын салаатыгар специалистары бэлэмнээһиҥҥэ улахан болҕомто ууруллар. Тыа сиригэр үлэлии барбыт эдэр дьоҥҥо эбии харчынан төлөбүр баар. Дьиэ тутуутугар квоталар бааллар», — диэтэ миниистир оскуолаҕа көрсүһүүгэ.
Кириэс Халдьаайыга «Илгэ'» ТХПК үүтүн собуотугар сырытта. Бу тутуу «бытыктаах тутууга» кубулуйда. Собуот тутуута 2008 с. саҕаламмыта. Билигин оборудованиетын чаастара тиийбэттэр. Ону кооператив салайааччыта А.Н. Кузьмин «Туймаада-Лизинг» генеральнай дириэктэрин Дмитрий Махаровы кытта быһааралларыгар сорудахтанна.
«Сөптөөх ирдэбиллэргэ эппиэттиир бородууксуйаны суулуур тааралары булунуоххутун наада. Собуоту бэс ыйыгар — үүтү туттарыы үгэнэ саҕаламмыт кэмигэр -үлэҕэ киллэриэххэ наада», — диэтэ миниистир Артемьев.
Кэскил сэлиэнньэтигэр сайын туттуллар уу ситимин тардыыны былааҥҥаа киллэрэри туруорустулар. «Байаҕантай» массыына-тыраахтыр станциятын салайааччыта Семен Охлопков икки техниканы «Туймаада-Лизинг» тэрилтэттэн ылбыт, кредитин толору төнүннэрбит. Оттон тэрилтэ киниэхэ докумуоннарын күн бүгүнүгэр дылы биэрэ илик.
Хаандыга б. оҕуруот аһын харайар анал сир аһыллыыта буолла. Оборудованиенан хааччыйарга өрөспүүбүлүкэ бюджетыттан 5 мөл. солк. көрүллүбүт. «2005 с. саҕалаан өрөспүүбүлүкэҕэ үс овощехранилище тутуллубут. Томпо оройуона оҕуруот аһын олордууга улахан кыахтааххыт. Онон үлэни саҕалаан, иннигит диэки кимиилээхтик баран иһиҥ», — диэтэ Александр Артемьев.
