23 От ыйа 23.07
  • 18°
  • $ 87,78
  • 95,76

Кикбоксер Василий Васильев чөмпүйэнээт үрдүк таһымнаахтык ааһарыгар баҕарар

13:01, 09 марта 2021
Текст:
Читайте нас на
Яндекс Новости
ЯДВ

Муус устар 5-11 күннэригэр Дьокуускайга Арассыыйа кикбоксиҥҥа чөмпүйэнээтэ ыытыллыа. Күрэхтэһии кик-боксер Александр Иванов аан дойду кик-боксиҥҥа чөмпүйүнээтигэр ССРС устуоруйатыгар бастакытын кыайбыта 30 сылыгар ананыа.


Спортсмен, кикбоксиҥҥа өрөспүүбүлүкэ сүүмэрдэммит хамаандатын сүбэһит-тренера Василий Васильев күрэхтэһии үрдүк таһымнаахтык ааһарыгар баҕарар. Чөмпүйэнээт иннинэ кини бэйэтин ситиһиилэрин ахтар.

Василий уһулуччулаах спортсмен Александр Иванов өрөгөйүгэр кикбоксинг көрүҥэр уһуйуллубут киһи. Кини 1965 сыл от ыйын 10 күнүгэр Ньурба улууһун Хорула нэһилиэгэр төрөөбүт. Оскуолаҕа үөрэнэр сылларыгар тустуунан, буоксанан дьарыктаммыт. Буоксанан утумнаахтык аармыйаҕа сулууспа кэннэ дьарыктанан саҕалаабыт. Оччолорго кини, Дьокуускайдааҕы 1№-дээх СПТУ устудьуона, өрөспүүбүлүкэ үтүөлээх тренерыгар Вильям Ивановка дьарыктанар.

«Мин бастакы тренердарбар Вильям Ивановка уонна Семен Аммосовка махталым муҥура суох. Кинилэр миэхэ дьылҕам бэлэҕэ буолаллар. Семен Аммосов миэхэ уҥа илиибинэн короннай «кросс» уонна «прямой» охсууларбын туруорбута», — диэн ахтар спортсмен.

Лиссабоҥҥа ыытыллыбыт Европа чөмпүйэнээтигэр Василий ити ньымаларынан икки утарылаһааччыларын дириҥ нокаутка ыыталаабыт. Лоу-кик көрүҥҥэ 57 кг диэри ыйааһыҥҥа ити нокауттар чөмпүйэнээт устуоруйатыгар кииртэр.

1993 сыл күһүнүгэр Василий дьарыгын, Вильям Иванов суох буолтун кэннэ, Василий Егоров уонна Владимир  Иванов дьарыктыыр «Кут-Сүр» кулууптарыгар салҕыыр. Кылгас кэм иһигэр дьарыктанан, 1994 сыл кулун тутар ыйыгар СГУ «Сэргэлээх» култуура киинигэр ыытыллыбыт өрөспүүбүлүкэ чөмпүйэнээтигэр Константин Тимофеевы очукуонан кыайар. Константин оччолорго лоу-кик көрүҥҥэ аан дойду чөмпүйэнээтин призера (WAKO, Будапешт, Венгрия, 1993 г.).

«Ити кэннэ Владивостокка ыытыллыбыт бүтүн Арассыыйатааҕы «Звезды России» турнирга Арассыыйа чөмпүйүөнүн иккис рауҥҥа нокаукка ыытан, кыайыыны ситиспитим. Ол кэннэ Челябинскайга Азия чөмпүйэнээтигэр түөртэ киирсибитим. Финалга Узбекистан чөмпүйүөнүн хаста да нокаутка ыытан кыайбытым», — диир Василий.

Салгыы Киевка ыытыллыбыт аан дойду күрэҕэр 54 киилэҕэ диэри ыйааһыҥҥа Василий кыһыл көмүс мэтээли ылары ситиһэр.

1996 сыллаахха Белградка ыытыллыбыт Европа чөмпүйэнээтигэр эрдэ ылбыт титулун хос көмүскүүр. Онтон Хорватияҕа ыытыллыбыт аан дойду күрэҕэр кыайан, спорт үтүөлээх маастарын аатын ылар.

«Мин ити күрэххэ түөртэ киирсибитим. Марокканецтыын уонна финалга поляктыын киирсиилэрбин ордук өйдүүбүн. Поляктыын киирсиибэр бастакы рауҥҥа хотторбутум. Онтон өй ылан, утарылаһааччыбын үөрэтэн, удамыр нокаутка ыыппытым. Ити кэннэ киһим миигиттэн куота сылдьар буолта. Түмүгэр судьуйалар биир санааларынан кыайары ситиспитим. Мин итиннэ кыайыыларым алҕас, соһуччу буолбатахтарын чахчы дакаастаабытым. Арассыыйа былааҕын күөрэтэн, рингэни биир гына эргийбитим. Ытыс тыаһын доҕуһуолугар чахчы дьоллоох түгэни билбиппин өйдөөн хаалбыппын», — диир чөмпүйүөн.

Ити күрэхтэһиигэ Хорватия ыалдьааччылара аан дойду икки төгүллээх кыайыылааҕар  ытыс тыаһын атахтарыгар туран бэлэхтээбиттэр.

«Мин бу кыайыыларбынан доҕотторбор Василий Павловка, Максим Никитиҥҥа уонна Иннокентий Макаровка махталлаахпын. Хомойуох иһин кинилэр билигин биһиги кэккэбитигэр суохтар. Тренердарбар Владимир Ивановка уонна Василий Егоровка махталым муҥура суох.

Маны таһынан, СӨ кикбоксиҥҥа Федерациятын 1994 сыллаахтан салайбыт Егор Борисовка махтанабын. Кини миэхэ иккис «аҕа» тэҥэ, Егор Афанасьевич көмөтүнэн саха кикбоксердара аан дойду улахан ареналарыгар тахсар кыахтаммыттара.

Ураты махталбын кэргэммэр Елизавета Петровнаҕа биллэрэбин. 30 сыл бэйэ-бэйэбитин өйөнсөн, кыайыы өрөгөйүн билэн кэллибит. Икки уолаттарбытынан киэн туттабыт», — диир Василий. 

Елизаветалаах Василий улахан уоллара Петр 26 саастаах. Кини Уһук Илиҥҥэ буоксаҕа 7 төгүллээх чөмпүйүөн, «А» кылаастаах норуоттар ардыларынааҕы «Мемориал Короткова» турнир үс төгүллээх чөмпүйүөнэ. 2020 сыллаахха Саха сириттэн бастакытын Турцияҕа ыытыллыбыт буоксаҕа рейтинговай профессиональнай киирсиигэ кыайбыта.

«2019 сыллаахха Ньурба улууһун Таркаайы нэһилиэгин баһылыгынан үлэлээн бүппүтүм кэннэ Леонид Спиридонов «Триумфка» тренерынан ыҥырбыта. Онон бүгүн өрөспүүбүлүкэ кикбоксиҥҥа сүүмэрдэммит хамаандатын сүбэһит-тренерынан үлэлии сылдьабын», — диэн кэпсээнин түмүктүүр Василий Васильев.

Сиһилии манна аах https://ysia.ru/vasilij-vasilev-ya-zapomnil-tot-schastlivyj-mig/

Следите за самым важным и интересным в Telegram-канале и WhatsApp-группе ЯСИА