16 От ыйа 16.07
  • 23°
  • $ 87,81
  • 95,78

II Хомустаахтар Ньукуолун куһун нэһилиэгинэн амсайдылар (ВИДЕО)

18:32, 22 мая 2018
Текст:
Читайте нас на
Яндекс Новости
ЯДВ

Нам улууһун II Хомустааҕар бүгүн олохтоох дьаһалта көҕүлээһининэн нэһилиэгинэн мустан, Ньукуолуну аан бастаан бэлиэтээтилэр. 


Олохтоох дьаһалта баһылыга Лев Новгородов маннык тэрээһин дьону бэркэ түмэр айылгылаах эбит диэн этэр.

Мин бастаан утаа отучча эрэ киһи кэлэрэ буолуо дии санаабытым. Онтум 60-ча киһи кэлбититтэн наһаа үөрдүм. Тэрээһиммит саҕаланыытыгар уоппутун аһаттыбыт.

Былырыын Чурапчы Мугудайын эр дьоно биир дойдулахтарын мунньан аһаппыттарын холобурга ылан, «үтүө дьыала батыһыннарыылаах»  диэн толкуйунан сиэттэрэн, нэһилиэкпит эр дьоно кыттыһан, отучча куһу, 40-ча собону астаан, дьоммутун-сэргэбитин күндүлээтибит.

Онон Ньукуолуммутун бэлиэтээн, сайыммытын көрүстүбүт, оһуохайдаатыбыт, — диэн үөрэн-көтөн кэпсиир Лев Новгородов.

Эн бэйэҥ куһу төһө «кыайдыҥ?» — диэн ыйытыыбар баһылык: «Биир хаастаахпын, биэс кустаахпын. Бэйэм холбор сөп. Онтон иккитин дьоммутун аһатарга кыттыстым«, — диэн хоруйдаата.

Лев Новгородов төрөөбүт дойдутугар былырыын баһылыгынан талыллыбыта.

Дойдубар төннүөм иннинэ куоракка үлэлээбитим. Салайар үлэҕэ үөрүйэхтэнэн баран, төрөөбүт дойдугар төннөн үлэлиир баар эбит — олох күндү бэлэҕэ! Били, «Дьол диэннэрэ бу буоллаҕа…» — диэн ырыаҕа ылланарын курдук,   — диэн санаатын үллэстэр эдэр баһылык.

Бастакы саҕалааһын — дьону түмүү Ньукуолунтан саҕаламмыта, кырдьык да, нууччалыы эттэххэ, символичнай. Саха Саҥа дьыла эдэр салайааччыга сонунтан сонун сүүрээни «бэлэхтээн» иһиэ буоллаҕа.

— «Эдэр саас» сайт суруналыыстара өрөспүүбүлүкэҕэ ыытыллар үтүө дьыалалары холобурдаан сырдатаргыт наһаа үчүгэй. Киһи киһиттэн үөрэнэр. Холобур, былырыын улуустарга кыаммат ытык кырдьаҕастарга, элбэх оҕолоохторго кус бөҕөтүн бэрсибиттэрин туһунан сырдаппыккыт аҕай. Оттон быйыл кырдьаҕастарга кус түҥэппэтэх нэһилиэк суоҕун тэҥэ быһыылаах. Ол туһунан эмиэ хото сырдаттыгыт. Биһиги былырыын мугудайдары суруйбуккутун өйдөөн кэлэн, кинилэр холобурдарынан дьоммутун-сэргэбитин аһаттыбыт, — диэн кэпсиир Лев Новгородов.

Кырдьык биһиги, суруналыыстар, сырдатар үтүө холобурдарбытын өрөспүүбүлүкэбит нэһилиэктэрин баһылыктара болҕомтоҕо ылан, туһаналларыттан ордук күндү туох баар буолуой? Үлэбит түмүктээҕиттэн үөрэбит эрэ!

Елена ПОТОЦКАЯ, «Саха сирэ» хаһыат,  edersaas.ru

Хаартыскаҕа: Лев Новгородов түһэриитэ.

6

0
Следите за самым важным и интересным в Telegram-канале и WhatsApp-группе ЯСИА