Амма улууһугар Амма — Бөтүҥ трассатын чугаһыгар үтүө санаалаах дьон табаны быыһаатылар. Кыыл муустаах ууга түспүт. Ол туһунан «Амма олоҕо» хаһыат суруйар.
«Сарсыарда рейдэттэн кэлэн иһэн, суол кытыытынааҕы күөлгэ түспүт табаны хостуу сылдьар дьону көрдүбүт. Икки булчут эрэһиинэ тыыларыгар олорон, кыылы үүрэн, муустаах ууттан таһаара сатыыллар. Биһиги көмөлөстүбүт, онон бары хостоон таһаардыбыт. Таба ойууртан тахсыбыт уонна суолу туораары чараас мууһу үктээн, ууга түспүт. Туруга этэҥҥэ», — хаһыакка оройуоннааҕы айылҕа харыстабылын иниспиэксийэтин эколога Станислав Васильев эттэ.
