Быйылгы «Хотугу Синергия» ыччат форума атырдьах ыйын 7-11 күннэригэр Мэҥэ Хаҥалас улууһун Аллараа Бэстээх бөһүөлэгэр баар Тырааныспар техникумугар уонна Спорт үрдүкү маастарыстыбатын оскуолатын баазатыгар ыытыллыаҕа. Форум кэмигэр бастыҥ бырайыактаахтар СӨ бырабыыталыстыбатын гранын ылыыга куонкурустаһыахтара.
Форум үс хайысхалаах: «Эн — урбаанньыккын», «Мин — Инженербин» уонна «Волонтер оскуолата». Хас биирдии хайысха анал бырагыраамалаах үлэлиэҕэ. Ол курдук, «Эн — урбаанньыккын» хайысхаҕа «Арассыыйа эдэр урбаанньыта» күрэс эрэгийиэннээҕи түһүмэҕэ ыытыллыаҕа. Үгэс быһыытынан, Уһук Илиҥҥи «Мин — Инженербин» куонкурус иккис түһүмэҕин «Мин — Инженербин» хайысха быһаарыаҕа. Оттон «Волонтер оскуолата» Арассыыйаҕа Үтүө дьулуур сылынан буолар тэрээһиннэр тула үөрэх бырагыраамалаах ыытыллыаҕа. Хас биирдии хайысха 50 кыттааччыны хабыаҕа.
«Быйыл грант уопсай суумата 1 мөл. солк. тэҥнэһэр. Маны үс хайысхаҕа үллэриэхпит», — диэн СӨ Ыччат дьыалаларын уонна дьиэ кэргэн бэлиитикэтин миниистирин бастакы солбуйааччы Василина Лукина иһитиннэрдэ.
Былырыын форум түмүгүнэн, «Эдэр урбаанньыттар» хайысхаларыгар миэстэлэспит Сунтаар ыччата Денис Павлов уонна Уус Алдантан Гаврил Троев бырайыактарын Арассыыйа таһымыгар билиһиннэрбиттэрэ. Денис «Дархан» киинэ тыйаатырын, оттон Гаврил «Хоро» бэкээринэ туһунан бырайыактары оҥорбуттара.
«Хотугу Синергия» формуҥа кыттыан баҕалаахтар от ыйын 27 күнүгэр диэри https://ais.fadm.gov.ru/event/11237 регистрацияланыаххытын сөп.
Айтана Аммосова, edersaas.ru
