21 От ыйа 21.07
  • 29°
  • $ 88,02
  • 96,04

Үөһээ Бүлүүгэ Уу Саха Омук "Тыыннаах эбиппит" киинэтэ сүрэхтэннэ

16:02, 20 февраля 2021
Текст:
Читайте нас на
Яндекс Новости
ЯДВ

Үөһээ Бүлүү оройуоннааҕы култуура дьиэтигэр “Тыыннаах эбиппит” диэн ырыа хомуурунньугунан уһуллубут киинэ сүрэхтэниитэ буолла. Олунньу 19 күнүгэр музыкальнай киинэни көрүү кэннэ санаа этинээччи дьон үгүс буолла.


Тыыннаах легенда буолбут “Чолбон” рок-бөлөххө, чэпчэки атлетикаҕа аан дойду кылаастаах спорт маастара, Россия 4 төгүллээх чөмпүйүөнэ Сардаана Трофимоваҕа, гиирэ анньыытыгар аан дойду кылаастаах спорт маастара Михаил Саввиновка, СӨ Ил Дархана Айсен Николаевка, улуус баһылыга Владимир Поскачиҥҥа, номох буолбут Үс Хоһуун тустууктарга анабыл хоһооннорунан айыллан тахсан сиппит-хоппут киинэ буолбут.

Бу саҥалыы тыыннаах ураты музыкальнай киинэни көрүү кэннэ санаа этинээччи дьон үгүс буолла. Инньэ гынан киинэни ырытыы кэпсэтии быһыытынан барда.

Музыкальнай бырайыак режиссера улуустааҕы норуот театрын кылаабынай режиссера Малик Тойтонов – Уу Саха Омук. Бэйэтэ Нам нэһилиэгэр төрөөбүтэ, Арктикатааҕы государственнай культура уонна искусство институтун бүтэрбитэ. Үөһээ Бүлүүгэ үлэлии кэлиэн иннинэ Ньурбатааҕы драматическай театрга артыыһынан ананан үлэлии сылдьыбыта.

Киинэ продюсера Дмитрий Дьячковскай:

– Ахсынньы ыйга, -50 кыраадыс тымныылар  турар кэмнэригэр, Дүллүкү нэһилиэгин өрүс үрдүгэр хоно сытан, ону тэҥэ Хоро нэһилиэгин биэрэгэр, Өргүөттүүр суолга турар кыһыннары тоҥмот уста сытар уулаах, кэрэ айылҕалаах Муус аппа сиригэр устубуппут. Ырыа матыыптарын, киинэ музыкальнай доҕуһуолун олохтоох уолаттар “Үргэл” бөлөх айан таһаарбыт. Киинэҕэ “Чолбон” рок-бөлөх солиһа Юрий Васильев-Дьураай, “Үргэл” бөлөх уонна “Тобуруокап сиэттэрэ” этно-бөлөх уолаттара дьоруой быһыытынан уһуллубуттар.

Малик Тойтонов-Уу Саха Омук:

– Хоһооннор 20 күн иһигэр олус чэпчэкитик суруллан хаалбыттара. Айсен Кысылбаиков кэлэн олус табыллан, сатанна дии санаатым. Бэйэтин көрдөөн муна-тэнэ сылдьар киһи көстөр. Сахалар хайдах олорон, олох ыараханын туораан кэлбиттэрин көрдөрө сатаатыбыт. Өлбөт үөстээх сахалар Саха диэн сирэй-харах, тас дьүһүн, таҥас-сап, хаан да буолбатах, саха диэн Кут. Көмөлөспүт, кыттыспыт бар дьоммор махтанабын.

Улуус баһылыгын бастакы собуйааччыта Семен Михалев:

– Дьоһуннаах бырайыак оҥоһуллубутуттан олус соһуйдум даҕаны, үөрдүм даҕаны. Былыр-былыргыттан Үөһээ Бүлүүгэ быһый, күүстээх-уохтаах спортсменнар төрөөн-үөскээн тахса туралларын уолаттар аныгылыы көрүүнэн маннык сонун үлэ гынан көрдөрбүттэрэ олус үчүгэй. Биһиги, үөһээ бүлүүлэр, махталлаах көрөөччүлэрбит. Уолаттар айан иһиҥ, оттон махталлаах көрөөччүлэр ытыс дохсун тыаһынан көрсө туруохтара.

Люция Тойтонова, улуус баһылыгын социальнай боппуруостарга солбуйааччыта:

– Уолаттар сыанаҕа тахсан ыллаатахтарына кэннилэригэр киинэ көстүө дии санаабытым, толору киинэ буолбут. Күн аайы аттыбытыгар сылдьар ыччаппыт, күннээҕи олохторугар сылдьар курдук уһуллубуттарын сөбүлүү көрдүм. Малигы ураты көрүүлээх диэн саныыр этим. Саҥа дьыллааҕы өрөбүллэргэ Дүллүкүгэ хоно сытан устубуттара. Этиэхтэрин баҕарбыттарын эппиттэр, дьыалаларыгар бэриниилээхтик үлэлээбиттэрэ олус  хайҕаллаах.

Малик Тойтонов үөрэппит учуутала Нина Саввинова:

– Өлүөхчэ өлбөт, быстыахча быстыбат саха омук олоҕун көрдүбүт, чахчы тыыннаах эбиппит. Тыыннаахпытын ааһан өссө өрөгөйдөөн олорор эбиппит диэн тыыны көрдөрдө. Мин олус астынным. Кини үлэтэ букатын ураты буолааччы. Бачча элбэх уолу түмэр үлэни тэрийэн ыыппыт уонна наһаа үчүгэй үлэни оҥорон таһаарбыт.  Ыччаттар баҕаран туран үлэлээбиттэрэ көстөр. Саҥа сахалар саҥа тылынан сахалыы этиннилэр. Киэҥ сэҥээриини ылар үлэ тахсыбыт. Саха ыччатыгар стимул биэрбиккит иһин уонна ыччакка ыҥырыы таһаарбыккыт иһин махтанабын.

Уйбаан Чыычаахап, улуустааҕы бэтэрээннэр Сэбиэтин бэрэссэдээтэлэ:

– Уопсайынан бу үлэни кыһыҥҥы этно-рок фантазия курдук ылынным. Саамай тымныы күннэргэ уһуллубутун көрөн олус сөхтүм. Сүрдээх күүстээх үлэ тахсыбыт дии санаатым.

Киинэ кэнниттэн санаалары
«Үөһээ Бүлүү» хаһыат суруналыыһа Кристина Яковлева хомуйан суруйбутун улуус инстаграм-сирэйигэр таһаардылар.

Следите за самым важным и интересным в Telegram-канале и WhatsApp-группе ЯСИА