Саха сирин улахан экраннарыгар ArtDoydu киинэ-устуудьуйа оҥорон таһаарбыт күүтүүлээх «Карина» киинэ муус устар 11 күнүгэр көһүннэ. Бастатан туран, көрөөччүлэр артыыс оҕо София Прибылых талааныгар болҕомтолорун уурдулар.
Софияны кытта ЯСИА суруналыыһа Иван Евсеев быстах кэпсэттэ.
— София, киинэҕэ уһуллууттан санааҥ?
— Үчүгэй. Элбэх мүччүргэннээх сырыылар буолбуттара. Элбэх эдьиийдэнним, убайданным, эбээлэнним, эһээлэнним.
— Ойуурга уһуллууну сөбүлээтиҥ?
— Режиссер тугу эппитин барытын толорон испитим. Отон сиэбитим. Минньигэс этэ. Өссө өрүскэ сөтүөлээбиппин сөбүлээбитим. Барытын сөбүлээбитим.
— Ойууртан куттамматаҕыҥ?
— Суох. Аттыбар режиссер уонна да атыттар бааллар.
— Киинэҕэ үөһэттэн төкүнүйэҕин. Итини хайдах устубуттарай?
— Убайдарым миигин хабан ылбыттара. Кинилэри көрдөрбөтөхтөрө. Бүттэ. Хойуоһун диэбиттэрэ.
— Туох ыарахаттары көрсүбүккүнүй?
— Таҥаспар. Колготкабар. Алдьаммыт этэ. Онтон мин оннугу сөбүлээбэппин.
— Ыты кытта уһулларгар куттамматаҕыҥ?
— Суох, ыттары сөбүлүүбүн. Наһаа үчүгэйдэр. Бэйэм ыттаахпын, кини аата Хана, боруодата акита-ину.
— Артыыс буолуон баҕарар диэбиттэрэ эйигин. Оннук дуо?
— Оннук, баҕарабын. Өссө ыттарга приют арыйыахпын баҕарабын.
