Дьокуускайга остуол тенниһигэр Уһук Илиҥҥи федеральнай уокурук чемпионата буола турар. Манна алта регион күүстээх спортсменнара кытталлар. Күрэхтэһии «Кыайыы 50 сыла» спорт Дыбарыаһыгар тохсунньу 25 күнүгэр саҕаланна, түөрт күн салҕанан барыа.
Саха сирин киин куоратыгар остуол тенниһигэр Хабаровскай, Приморскай кыраайдартан, Амур, Сахалин, Магадан уобаластарыттан уонна Саха Өрөспүүбүлүкэтиттэн хамаандалар бааллар.
«Саха сирэ бу күрэхтэһиини иккис төгүлүн тэрийэр. Бастаан 2013 сыллаахха ыытыллыбыта. Онно биэс хамаанда кыттыбыта. Бу буола турарга бастыҥ остуол тенниһин оонньооччу аатын ылар иһин 118 спортсмен алта регионтан кыттар. Барыларыгар ситиһиини, табыллыыны, ким күүстээх ол кыайдын», — диэн регион спордун миниистирэ Георгий Балакшин чемпионат арыллыытыгар эттэ.
«Бастакы күн түмүгүнэн дьахталларга күрэх түмүктэннэ. Приморьелар кыайдылар, Саха сирин хамаандата иккис буолла, боруонсаны магаданнар уонна хабаровскайдар илдьэ барыахтара», — диэн ЯСИА-ҕа норуоттар икки ардыларынааҕы категориялаах арбитр Александр Неустроев кэпсээтэ.
Саха сирин эр дьонун хамаандатын аатырбыт теннисистар Василий Румянцев, Ньургун Сабарайкин, Богдан Капитонов, Анатолий Ефремов уонна Михаил Кылабысов көмүскүүллэр.
Кыайбыт хамаанда Россияҕа Уһук Илин аатыттан киирсиэ. Чемпионат олунньу бүтүүтэ Пенза куоракка ыытыллыа.
