Бүлүү улууһун баһылыга Сергей Винокуров олохтоох Бэтэрээн сэбиэтин кытта көрсөн, үлэ-хамнас туругун, баар проблемалары билиһиннэрдэ уонна мунньах кыттыылаахтарын элбэх боппуруостарыгар хоруйдаата.
Бэтэрээннэр улуус салайааччытын бүөмнээн көрсүбүччэ, мунаарар боппуруостарыгар эппиэттэри ылан, таарычча санааларын этинэн, күө-дьаа буоллулар.
Бэтэрээн сэбиэтин Президиумун киэҥ ыҥырыылаах мунньаҕар президиум чилиэттэрэ бука бары, 13 нэһилиэктэн бэтэрээн сэбиэтин бэрэссэдээтэллэрэ, 3 уопсастыбаннай түмсүү салайааччылара, «Сэрии сылын оҕолоро» улуустааҕы общественнай түмсүү салайааччылара, куораттааҕы сэбиэт активистара — барыта 40-ча киһи мустубут этэ.
Президиум мунньаҕар элбэх кэпсэтии, дьүүллэһии кэнниттэн, хас да боппуруоска быһаарыы ылылынна. Ол курдук, 2016 сылга нэһилиэктэринэн, уопсастыбаннай түмсүүлэринэн бэтэрээннэри кытта үлэҕэ куоталаһыы усулуобуйата бигэргэтилиннэ.
Ыччаты патриотическайдыы иитиигэ үлэ былааннара уонна бу үлэҕэ бэтэрээннэри киэҥник кытыннарыы тускуллара бэлиэтэннилэр.
Бэтэрээн сэбиэтин Президиума 2016 сылы улууска тыыл уонна үлэ бэтэрээннэрин сылынан биллэрбитэ. Бэтэрээннэри оскуолаларынан, кылаастарынан сыһыартаан, график быһыытынан көрсүһүүлэр тэриллиэхтээхтэр. Сорох бэтэрээннэр меценат буолан, кылаас бастыҥ үөрэнээччилэригэр, кыаммат-тиийиммэт ыаллар оҕолоругар стипендиялары олохтуулларыгар сүбэлэннэ.
Президиумҥа мантан да атын араас боппуруостар дьүүллэһилиннилэр. Улуус бэтэрээннэрин актыбыыстара күүрээннээх үлэни тэрийсэн, Улуу Кыайыы 75 сылын үбүлүөйүн көрсө элбэхтик үлэлэһэрдии былааннанан тарҕастылар. Бу кэнниттэн нэһилиэктэргэ, общественнай түмсүүлэргэ даҕаны бэтэрээннэр үлэҕэ турунуулара, общественнай үлэҕэ кыттыһыылара биллэ күүһүрүө диэн эрэл үөскээтэ.
