VI — с «Азия оҕолорун» норуоттар икки ардыларынааҕы оонньуу уота муус устар 21 – 25 күннэригэр Томпо улууһугар ыалдьыттыыр.
Бэҕэһээ, муус устар 21 күнүгэр, уоту ыаллыы Өймөкөөн оройуонун делегацията икки улуус границатыгар аҕалан туттарда. Томпо оройуонун аатыттан уоту улуус баһылыгын соц боппуруостарга солб. Петр Новгородов баһылыктаах делегация туттубут. Хаардаах хайалар күөннэригэр сахалыы сиэринэн ыалдьыттары арыылаах алаадьынан уонна уохтаах кымыһынан айах туттубут, сирбитин –уоппутун аһаттыбыт.
Онтон уоту Томпо оройуонун бастакы нэһилиэнньэлээх пуунун – Теплай Ключ сэлиэнньэтин спортсменнара: учуутал, ыччат лидерэ Айыы Куо Михайлова, МТ администрациятын специалиһа Анастасия Плюйко, орто оскуолатын үөрэнээччилэрэ Анна Брик, Юрий Ком-Юн-Чун, Степан Швеченко тутан сүүрдүлэр.
Петр Новгородов, «Азия оҕолорун» уотун хаһаайыттара Дмитрий Горохов, Анна Яковлева уонна Христофор Чукров Сталин репрессиятын саҕана тыһыынчанан хаайыылаах харытын күүһүнэн тутуллубут Магадантан Дьокуускайга тиэрдэр аатырар «Халыма» массыына суолун устун сүүрдүлэр. Ити хара балыырга түбэһэн буруйа суох сууттанан дьон сырдык кэриэстэригэр ананна.
Кэпсээҥҥэ киирбит билигин да аныгы ирдэбилгэ хоруйдуур гына оҥоһуллубакка сытар кыараҕас «Куобах ороҕо», аҕыйах сыллааҕыта 100-нэн улахан техника уонна биир оччо дьон тупсаран оҥорбут Хара уонна Араҕас Кыбычыыннар диэн сирдэргэ тохтобуллары оҥордубут. «Шаман» үрүйэҕэ сэргэлэргэ салама ыйаатыбыт, бэлэх уурдубут.
Уруккуттан араас республиканскай спортивнай тэрээһиннэргэ көрсөн, кэпсэтэн билэр буолан Дмитрий Горохов биһиги биир дойдулаахпыт кэриэтэ буоларын, ол курдук Тополинайга үлэлээбитин, кыыһа улуус администрациятыгар ыччат специалиһынан үлэлээбитин кэпсиибин. Дьонум соһуйаллар.
Дмитрий Горохов:
— Кырдьык, 7,5 сыл Тополинайга олорбутум уонна үлэлээбитим. Кыыһым Яна «Алроса» кульутар киинигэр үлэлиир. Соторутааҕыта кыыстаммыта. Онон таарыччы оҕолорбор сылдьыам, сиэммин көрүөм. 24 күн 6 оройуон сиринэн айаннаан кэллибит. 4 сыл иһигэр манна суол-иис тупсубут, суол уустук учаастактарын оҥорбуттар, Теплай Ключ уулуссата асфальтаммыт, онон сүүрэргэ үчүгэй.
Теплай Ключ сэлиэнньэтигэр биһигини элбэх дьон тоҕуоруһан көрүстэ, ол иһигэр улахан дьон, бэйэлэрэ оҥорбут плакаттардаах оскуола уонна уһуйаан оҕолоро. Уоту нэһилиэк баһылыгын солб. Альберт Коробков тутта. Улахан дьон, оҕолор уонна ыччаттар ырыа-хоһоон бэлэхтээтилэр. Үөрүүлээх түгэн кэнниттэн бары астыныахтарыгар дылы хаартыскаҕа түстүлэр. Онтон уоту салгыы улуус кииинигэр – Хаандыга бөһүөлэгэр аҕаллыбыт.
