18 От ыйа 18.07
  • 17°
  • $ 88,09
  • 96,3

Айсен Дойду кинигэтэ французтуу тылынан таҕыста

11:20, 26 октября 2016
Текст:
Читайте нас на
Яндекс Новости
ЯДВ

Дьокуускай куоракка алтынньы 21 күнүгэр «Арчы дьиэтигэр» норуодунай суруйааччы Суорун Омоллоон уола Айсен Дойду 75 сааһыгар аналлаах айар биэчэрэ бэрт тэрээһиннээхтик буолан ааста. Манна үбүлээр айымньыларын тула кэпсэтии буолла, ырыа-тойук ылланна, эҕэрдэ этилиннэ.


Айсен Дмитриевич айар биэчэрин аһарыгар кэлбит дьоҥҥо уонна ыраах Францияттан кини «Древо жизни» кинигэтин французтуу тылбаастаабыт Эмили Майга махтанна. Саҥа айымньы айар алыбар ылларан бириэмэтэ билбэккэ ааһарын уонна киниэхэ өйөбүл, тирэх буолбут доҕотторун, үөлээннээхтэрин истиҥник саныырын ахтан ааста. «Мин кинилэртэн элбэххэ үөрэммитим», — диэн киэн тутта эттэ.

Франция култууратын үлэһиттэрин ааттарыттан биллиилээх тылбаасчыт, саха култууратын киэҥ эйгэҕэ тарҕатааччы Эмили Май саха суруйааччытын, киносценариһын үбүлүөйүнэн төлөннөөхтүк эҕэрдэлээтэ. Кини французтуу тылынан тылбаастаммыт саҥа кинигэтэ бүгүҥҥү үтүө киэһэҕэ сүрэхтэниитэ, бу Айсен Дойду айар талааныгар сүгүрүйүү буоларын бэлиэтээтэ. «Саха сирин улуу суруйааччытын уолун айымньыта Франция дьонугар-сэргэтигэр биллиэ диэн эрэнэбин. Баҕар өссө саҥа арамаана французтуу тылбаастанан бэчээттэниэ», — диэн чопчулаан эттэ.

Үбүлээри Саха сирин Суруйааччыларын сойууһуттан уонна Былатыан Ойуунускай аатынан литературнай музейтан Николай Винокуров-Урсун, «Сахабэчээт» автономнай тэрилтэ аатыттан Уйбаан Ойуур, Владислав Доллонов уонна «Саха суруйааччылара» ассоциация бэрэссэдээтэлэ Олег Сидоров эҕэрдэлээтилэр. Саха эстрадатын сулуһа Юрий Платонов бэйэтин репертуарыттан хас да ырыаны үрдүк таһымнаахтык ыллаан иһитиннэрдэ. Филологическай наука дуоктара Анастасия Мыреева Айсен Дойду «Белые лебеди Омолуку» арамаанын ис хоһоонун ырытта.
Дьоро киэһэ табылынна. Кэлбит дьон бары ытыктыыр суруйааччыларын туһунан истиҥ-иһирэх тыллары эттилэр, бэлэх-туһах туттардылар.
Айсен Дойду айымньыта французтуу тылбаастаммытын үөрэ-көтө бэлиэтиибит. Биллэнтуран, биһиги кини айымньылаахтык үлэлииригэр тирэх буоларга дьулуһуохпут, — диэтэ доҕоро, үөлээннээҕэ Владислав Доллонов.

Следите за самым важным и интересным в Telegram-канале и WhatsApp-группе ЯСИА