21 От ыйа 21.07
  • 25°
  • $ 88,02
  • 96,04

811 быыбардыыр учаастагынан араас тэрээһиннэр ыытыллыахтара

16:30, 14 марта 2018
Текст:
Читайте нас на
Яндекс Новости
ЯДВ

Кулун тутар 18 күнүгэр – Россия бэрэсидьиэнин талар күммүтүгэр, быыбардыыр учаастактарга култуурунай-сырдатар, аралдьытар тэрээһиннэр, бэстибээллэр, куонкурустар, дьаарбаҥкалар ыытыллыахтара. Дойду инники олоҕун, сайдыытын быһаарар ураты суолталаах күн буоларынан сибээстээн, тэрээһиннэр куорат бары болуоссаттарыгар, куорат таһынааҕы бөһүөлэктэргэ, улуус кииннэригэр, нэһилиэктэргэ туспа бырагыраама быһыытынан ыытыллаллара күүтүллэр.


633 тыһыынча быыбардааччы

Үөрүүлээх күн чэрчитинэн, уран тарбахтаахтар быыстапка-дьаарбаҥкалара, ырыа-тойук, үҥкүү-битии көҕүлүт­тэн тутуллуо. Маны сэргэ, доруобуйаҕа, дьарыктаах буолууга анаммыт дьаарбаҥкалар тэриллиэхтэрэ, хаартысканан быыстапкалар о.д.а. элбэх тэрээһиннэр тиһиктээхтик ыытыллаллара күүтүллэр. Саха сиригэр уопсайа 633 тыһыынчаттан тахса быыбардааччы баар. Өрөспүүбүлүкэ үрдүнэн 811 быыбардыыр учаастак тэриллиэхтээх.

Дьокуускайга

Автодорожнай, Сайсары, Октябрьскай, Киин, Строительнай, Губинскай, Промышленнай уокуруктарга баар быыбардыыр учаастактарга «Доруобуйа дьаарбаҥката», «Доруобуйа күнэ» диэн анал тэрээһиннэр ыытыллыахтара. Тыа хаһаайыстыбатын академиятыгар, оскуолаларга олохтоох оҥорон таһаарааччылар бородууксуйаларын хото атыылыахтара. Маны таһынан, көһө сылдьар атыы-эргиэн олохтонуоҕа. Учаастактарга араас куонкурустар, кэнсиэртэр, оскуола оҕолорун быыстапкалара, оҕолорго уонна төрөппүттэрэ маастар-кылаастарыытыллыахтара.

Октябрьскай уокурук 703-с учаастагар Үлэ дьаарбаҥката үлэлиирэ былааннанар. Бары учаастактарга «Куорат тупсаҕай эйгэтин тэрийии» бырайыак чэрчитинэн, Дьокуускай куораты тупсарыыга, киэргэтиигэ олохтоохтортон киирбит этиилэринэн куоластааһын тэриллиэҕэ. Хас биирдии учаастак ахсын «Быыбартан хаартыска» диэн хаартыскаҕа түһэр зона баар буолуоҕа.

Киин уокурук 724-с нүөмэрдээх учаастагар «Кыһыны ­атаарыы», 717-с учаастакка социальнай бырайыактар дьаарбаҥкалара ыытыллыаҕа.

Илин эҥээргэ

Илин эҥээр улуустарыттан саамай элбэх быыбардааччылаах улууһунан Мэҥэ Хаҥалас буолар. Бүгүҥҥү туругунан, манна 24737 киһи куоластыыр бырааптаах. Оттон Чурапчыга – 15035, Уус Алдаҥҥа – 13880 киһи. Кулун тутар 18 күнүгэр илин эҥээр улуустарын бары нэһилиэктэригэр сандал саас кэлбитин уруйдуур-айхаллыыр бырааһынньыктааҕы тэрээһиннэр ыытыллыахтара. Холобур, Мэҥэ Хаҥаласка «Саас-2018» диэн норуот күүлэйэ, быыстапкалар, дьаарбаҥкалар, куонкурустартэриллиэхтэрэ. Уус Алдаҥҥа «Дорообо, сандал саас» норуот күүлэйэ, хайыһар, хоккей өрөспүүбүлүкэтээҕи күрэхтэрэ, «Хомуур күрэх» спортивнай оонньуулар ыытыллыахтара. Тааттаҕа коллекционердар быыстапкалара, бильярд күрэҕэ, Чурапчыга нэһилиэктэринэн норуот күүлэйэ, шортрек, түөлбэлэринэн күрэхтэһии тэриллиэҕэ.

Киин улуустарга

Дьокуускай куораты кытары ыаллаһа олорор Хаҥалас улууһа 23092 быыбардааччылаах. Намнар – 15787, Горнайдар – 7011 быыбардааччылаахтар. Нам улууһугар баар быыбардыыр учаастактарга барыларыгар быыстапкалар, атыы-эргиэн дьаарбаҥкалара үлэлиэхтэрэ.

Горнайдар 18 саастарын туолбут, саҥа быыбардыы кэлэр ыччаттарга хас биирдиилэригэр бэлэх туттарыахтара. Нэһилиэнньэҕэ анаан босхо киинэ көрдөрүөхтэрэ. Хаҥаласка хас биирдии быыбардыыр учаастакка «Саха сирэ талар»диэн хаартыскаҕа түһэр зона үлэлиэҕэ. Онон, быыбардыы кэлбит дьон тута хаартыскаҕа түһэн, «ВКонтакте» эбэтэр «Инстаграм» социальнай ситимнэргэ таһааран, сыаналаах бириистэри сүү­йүөхтэрин сөп.

Бүлүү умнаһыгар

Ньурбаҕа – 18164, Бүлүүгэ – 17889, Үөһээ Бүлүүгэ – 11906, Сунтаарга – 16552 быыбардааччы олорор. Ньурбаҕа кулун тутар 18 күнүгэр Кыһыны атаарыы тэрээһинэ ыытыллара күүтүллэр. Быыбардыыр учаастактарга атыы-эргиэн дьаарбаҥката тэриллиэҕэ. Бүлүү куорат сүрүн болуоссатыгар «Становись на хоровод, весь Вилюйский народ» диэн норуот күүлэйэ, хапсаҕай өрөспүүбүлүкэтээҕи турнира ыытыллыахтаах. Үөһээ Бүлүүгэ Дьокуускай куорат аатынан сквергэ норуот күүлэйэ, «Россия – моя страна» ток-шоу, учаастактарга быыстапкалар, атыы-эргиэн дьаарбаҥкалара үлэлиэхтэрэ.

Хоту улуустарга

Орто Халымаҕа 490-с №-дээх учаастакка быыбардыы кэлбит дьон буор-босхо ФЛГ түһүөхтэрин сөп. Маны сэргэ, хас учаастак ахсын быыстапка-дьаарбаҥка, кэнсиэр ыытыллыаҕа. Булуҥ улууһугар «Снежный барс» спортивнай күрэхтэһии, «Брэйн-ринг» интеллектуальнай оонньуулар ыытыллыахтара. Улуустарга баар быыбардыыр учаастактарга барыларыгар атыы-эргиэн тэриллиэ, олохтоох оҥорон таһаарааччылар бородууксуйалара атыыланыаҕа.

Следите за самым важным и интересным в Telegram-канале и WhatsApp-группе ЯСИА
Тутаах тыллар