Быйыл сайын Верхоянскай куоратыгар Киров уулуссатын ханаалларын ыраастыахтара уонна “Тымныы полюһа” култуурунай-спортивнай комплекс дьиэтин өрөмүөннүөхтэрэ. Бу бырайыактар олохтоох көҕүлээһиннэри өйүүр өрөспүүбүлүкэтээҕи бырагыраамаҕа киирбиттэрэ.
“Хаар, ардах уута сүүрэр ханаалларын өрөмүөннүөхпүт. Бу суол бүрүөһүнүн бөҕөргөтөрүн сэргэ чугастааҕы тиэргэннэргэ уу мустарын суох гыныаҕа”, — диэтэ Верхоянскай куоратын баһылыга Евгений Потапов.
Бу бырайыагы олоххо киллэриигэ муниципалитет өрөспүүбүлүкэ бүддьүөтүттэн 1,5 мөл кээмэйдээх субсидияны ылыаҕа. Олохтоох бүддьүөккэ 250 тыһ солк көрүлүннэ, маны таһынан олохтоохтор көмөлөрүнэн 150 тыһ. солк. киириэҕэ.
Маны сэргэ 2014 с. тутуллубут “Тымныы полюһа” комплексы өрөмүөннүөхтэрэ. Манна билигин оҕо спортивнай оскуолатын филиала үлэлиир.
“Биһиги аныгы инвентары атыылаһыахпыт. Култуурунай-маассабай тэрээһиннэри ыытыыга уот-күөс тэрилин ылыахпыт”, — диэн бэлиэтээтэ Потапов.
Руслан Басыгысов, СИА
