Саха боксера Василий Егоров Читаҕа Арассыыйа чемпионатын кыһыл көмүс мэтээлин ылла. 51 киилэҕэ диэри ыйааһыҥҥа кини финалга Дагестантан Расул Салиевы кыайда.
Арассыыйа чемпионун аатын саха спортсмена бэһис төгүлүн ылла. Василий Егоров чемпион курун кытары 1,5 мөл. солк. наҕарааданы ылла.
Санатан эттэххэ, боксердар тус көрсүһүүлэрин 1:1 ахсааннаах этэ. 2019 сыллаахха Самараҕа дойду чемпионатын финалыгар Василий Егоров Салиевка хотторбута. Василий Егоров 2021 сыллаахха Кемерово куоракка буолбут дойду сүрүн рингэтин финалын чиэппэригэр реванш ылбыта.
Саха сирин сүүмэрдэммит хамаандатын лидерэ аан дойду түһүлгэтигэр Арассыыйа чиэһин көмүскүөн сөп. Алтынньы 5 күнүгэр бокс аан дойдутааҕы ассоциациятын дириэктэрдэрин сэбиэтэ Арассыыйа уонна Беларусь боксердарын аан дойдутааҕы күрэхтэһиигэ киллэрэллэрин туһугар куоластаабыта.
