Санкт-Петербурга сэтинньи 22 күнүгэр «Невские звезды» Бүтүн Россиятааҕы оҕо айымньытын бэстэбээлэ өрө көтөҕүллүүлээхтик буолан ааста. Манна дойду араас муннуктарыттан 400-тэн тахса айар дьоҕурдаах оҕо кэлэн кытынна.
Олор истэригэр Уус Алдан улууһун Бороҕонуттан Е.Ф. Габышев аатынан Оҕо спортивнай оскуолатын иһинэн үлэлиир «Энергия» үҥкүү ансаамбыла киирэн, үрдүк ситиһиилээхтик кытынна. Ол курдук ансаамбыл салайааччыта Туйаара Ларионова иитиллээччилэрин аҕалан, «Хореография» салаатыгар бэйэлэрин талааннарын көрдөрдүлэр.
Хаартыска: Анфиса Слепцова
Ыраах Саха сириттэн кэлбит кыттааччылар I истиэпэннээх лауреат үрдүк аатын ылан, биэс бастыҥ ансаамбыл иһигэр киирдилэр уонна тиһэх гала-кэнсиэргэ «Күн бытархайа» үҥкүүнү толорон, сааланы толору мустубут көрөөччүлэр сүрэхтэрин сүүйэ туттулар.
Толоруу кэнниттэн сорох көрөөччүлэр тулуйбакка чугаһаан: «Олус кэрэ тыыны бэлэхтээтигит, сааланы сырдыгынан толордугут. Хамсанаргыт чэпчэкитэ, киһи эрэ сөҕөр», — диэн санааларын үллэһиннилэр.
Бэстэбээл аҥардас сыанаҕа толоруунан эрэ муҥурдаммакка, салайааччыларга уонна кыттааччыларга маастар-кылаас ыытылынна. Ол курдук үҥкүү салаатыгар дьүүллүүр сүбэ бэрэссэдээтэлэ, хореограф, пластикаҕа режиссер, Санкт-Петербургдааҕы Культура институтун артыыс маастарыстыбатын кафедратын доцена, преподаватель Анна Тугушева инникитин хайдах бииргэ үлэлэһэргэ кэпсэтиини ыытта.
Хаартыска: Анфиса Слепцова
Онон кырачаан сулустарга, салайааччыларыгар Туйаара Лаврентьевнаҕа үлэлэрэ үрдүктүк сыаналаммытынан истиҥ эҕэрдэбитин тиэрдэбит, үөрүүлэригэр кыттыһабыт.
Ааптар: Анфиса Слепцова, РФ Суруналыыстарын сойууһун чилиэнэ, Санкт-Петербург к.
